通常黎講，如果大家想知道一部電子器材嘅內部構造，通常都要等到部機開賣，再等有心人買部黎拆畀大家睇。但如果你想知道PS5嘅內部構造，就唔使咁麻煩啦！因為Sony琴日主動放出一條官方拆解片，將成部PS5裏裏外外都拆出黎畀大家睇，逐個零件介紹畀大家！睇黎就係對PS5嘅設計非常自豪。

睇呢條片會有幾個最大嘅得著。首先佢係目前最能夠睇清PS5於現實中嘅外貌、大小嘅一段片，尤其當佢近距離放個人喺到，就能夠更好地了解PS5實際上有幾大部 (又的確係幾大部嘅)。第二，就係知道PS5機身左右嗰兩塊白色板原來只係外置裝飾，一拉一推就掹到出黎，換言之PS5推出後可能會有大量個人化選擇。而又由於M.2 SSD嘅插糟就喺塊板之下，第時要加大容量絕對冇難度。

第三，PS5非常著重散熱。唔單止一拆嗰兩塊裝飾就見到個直徑120mm、厚45mm嘅雙向散熱扇，拆到底仲會見到鬼咁大抽散熱片，而晶片組及散熱片之間更用上液體金屬黎做傳導，難怪早前日本媒體試機時都指散熱效能相當唔錯。

而PS5嘅AMD Ryzen Zen 2 8核16線程3.5Ghz CPU、AMD Radeon RDNA 2-Based 2.23Ghz顯示晶片、8粒加埋16GB嘅 GDDR6 記憶體、825GB SSD硬碟同SSD控制晶片，全部都係焊接於主機板上。壞處係代表將來大家部PS5有咩故障，好有可能係要成塊主機板換；好處就係好慳位，慳到有位將成個火牛收埋入機身入面，咁條電源線就真係一條線啦。