《Bloomberg》日前報導，預計於明日發佈會上公佈開售日及售價嘅PS5因為良率只有5成，導致Sony要調整本財政年度 (到下年3月) 嘅生產數字，比預期少400萬部。而Sony就火速發聲明回應，指公司從未改變過PS5嘅生產數字。

《Bloomberg》日前指，由於PS5嘅核心部份由AMD設計嘅處理器良率只有50%，換言之只有一半嘅PS5係符合出貨標準，所以PS5於3月前嘅生產量會減少400萬部，至大約1100萬部左右。消息亦導致Sony股價急跌3.5%。

但Sony後來以聲明回應《gamesindustry.biz》直指《Bloomberg》報導錯誤，Sony一直都冇改變過生產數字，但就冇透露實在係打算生產幾多部PS5。

PS5生產量與大家能唔能夠以正價買到部機返去息息相關。據報於4月時，Sony只係預計生產5、600萬部PS5，比當年PS4嘅首批生產量都要少，但隨住疫情令大家困喺屋企，先大幅提高生產數字。