Apple公司較早前正式推出傳聞多年嘅平價機iPhone SE系列第二代，因為擁有最新A13晶片關係，加上價錢親民，令手機相當受歡迎。不過，Apple慣例同一年內會推出2-3款手機，所以近日盛傳全新嘅iPhone12系列會於9月登場。

據網上消息指，iPhone12預計今年9月面世，價錢好大機會較iPhone11系列定價為低，其中4款手機售價為: 5.4吋iPhone 12($649 美元)、6.1吋iPhone 12($749 美元)、6.1吋iPhone 12 Pro($999 美元)以及6.7吋iPhone 12 Pro Max($1,099 美元)起，當然容量大嘅價錢亦會越貴。

而規格方面，傳聞iPhone 12系列將會用上Apple全新嘅A14晶片，亦即係話手機運算功能方面應該會進一步提升，令各項軟件威力亦會更加出色。另外，有人傳手機將會變為4鏡頭，但亦有消息指手機保留3鏡頭，但鏡頭將增至6400萬像素，要知道iPhone 11 Pro都只係1200萬像素，因此今次相機升級將非常令人期待。

仲有一點，就係此前唔少人講iPhone 12將會係Apple首部5G手機，雖然iPhone 12系列將擁有5G功能，但卻有分析師指手機並不是全面支援5G頻段。預計Apple將會因應市場不同而分別推出兩個12嘅版本: mmWave(毫米波)及sub-6GHz，即係一部手機將唔會同時支援以上兩個制式，因此未來使用iPhone 12可能導致你喺某啲國家/地區無法使用5G。