「量子領域」相信有睇Marvel嘅朋友一家記得，講緊嘅就係擁有強大力量嘅一個微型地方。咁現實世界中又有無「量子領域」呢樣野呢？有無「量子領域」我就唔知，但我就知道電腦巨頭Google日前宣稱，公司已經成功研發出量子電腦！

Google宣稱研發成功嘅量子電腦，其運算能力將會達到世界第一，舉例黎講商用電腦要運算1萬年嘅工作，量子電腦將只需要3分鐘就可以完成！不過，由於量子電腦目前仍處於實驗階段，所以佢現時只可以進行單次運算，但預計未來完成試驗將可以更進一步進行更繁複嘅運算。

Google研究人員表示：「我地動用研發出嘅量子電腦，只花200秒就可以完成100萬次量子電路嘅數據採集，但如果運用現時嘅超級電腦即可能需要花費1萬年。」

量子電腦能夠大幅提升運算速度，原因係與現時嘅主流電腦採用嘅二進制運算位元，喺運算期間只能夠代表0或1，但量子電腦則同時能夠代表0及1，因此當運算時能夠計算出嘅結果將會以極大嘅差異呈現出來。

如今量子電腦嘅誕生，將可以大幅提升各項科研嘅效率，特別係有部份運算現時電腦可能需要花費數千年，甚至數萬年才能夠得知結果嘅，如今都將可以獲得答案了。