有冇咁堅？兩分鐘幫手機叉滿電

文：MenClub Patrick　　圖：互聯網
POSTED ON 13 Jan 2015

兩分鐘幫手機叉滿電咁堅？先旨聲明，呢套唔係強國科技，唔使講「中國的會爆炸」住。不過，研發呢套技術嘅係以色列一間大學成立嘅新公司StoreDot，都唔傳統科技大國出品，信唔信得過，you諗you la。

上星期StoreDot就喺CES 2015（國際消費電子展）入面，展出咗運用呢套技術嘅完成產品，就係一個快速充電器。廠方透露，佢哋除咗用新方法製造充電器之外，仲要改造埋手機電池嘅內部構造，採用一種叫做「Nanodots（納米點）」嘅技術去增強電池嘅儲電能力，咁先至能夠達成兩分鐘叉滿電呢個咁驚人嘅效果。

但原來呢個極速都仲未係StoreDot嘅最終目標，佢哋宣稱呢套技術嘅原型，其實係用一種由短鏈胺基酸（Short-Chainaminoacids）製作嘅半導體元件去叉電，最快30秒就能夠叉滿一部手機！老老實實，嗰啲咩咩元件咩咩胺基酸，再解釋我哋都唔會明，聽住先啦。但睇嚟兩分鐘嗰個充電器，就可能喺不久嘅將來正式量產推出，值得留意吓。不過暫時廠方只係為Samsung手機開發呢種高速充電池，都唔知係咪又俾三叔收買咗成為獨家技術，係嘅話，其他手機又冇得用，sosad。