雖之係同NASA合作，不過UberElevate並唔係衝出外太空，而係喺較低空域接載乘客，由NASA協助開發空中交通管理系統，追蹤空中交通狀況。每架空中的士預計可載四個人，時速322公里。由模擬影片中見到，Call空中的士嘅方法有啲似搭直升機，用手機App預約之後，去到Uber Skyport航運大樓，利用電子登機證過關後就可以坐上小型飛機。

家陣由三藩市去聖荷西，坐UberX需要1小時40分鐘；第日坐Uber空中的士，15分鐘就到。你諗住實好貴，好似坐直升機過大海咁？Uber出埋價錢表，目前坐UberX嘅價錢係111美元（約865港元），而搭乘空的士價錢就係129美元（約1,000港元），長遠仲計畫減到20美元（約155港元）。

Uber之前都有推出過直升機服務Uber Chopper，但反應一般，今次聽落似係變奏版。Uber方面計畫2020年起於洛杉磯試飛，其餘試點城市包括美國達拉斯及德州；預計到2028年洛杉磯奧運會時需求會增加。

來源：Uber, USA Today