「共享隨身充電器」計畫　2蚊租充電器？

文：MenClub 路兒　　圖：互聯網
POSTED ON 31 Oct 2017

近期「共享」一詞大熱，乜嘢都可以貼上「共享」之名，拎出嚟又變成創新概念。最近小記就見到個「共享隨身充電器」計畫，當堂嚇一跳，尿袋都可以同人共享互插，每半小時收$2，咩玩法？

呢個「共享隨身充電器」計畫由本地初創企業MobiJuce籌辦，特色係可以用手機App搵附近嘅充電器，然後喺全港任何一個JuceBox充電站歸還。充電器App可以睇到附近JuceBox充電站嘅位置同充電器數量，有iPhone插頭、Andriod插頭，亦有Type-C插頭；到達後用App掃描機座上嘅QR Code，即可以拎出充電器。付款方式為信用卡，每半小時$2，租全日$20，無需按金；3日唔還的話，就收你$129當你買咗。

目前只有加州大廈一個JuceBox供電站有電租，但MobiJuce預計未來兩星期會增設10個充電站，到2018年頭供應點會擴充至1,000個。可以隨處借隨處還都算方便，又唔驚冇記性唔記得差尿袋；之不過唔少Cafe、商場以至網絡供應商都有免費借尿袋服務，便利店亦有得畀錢租。再者，乜舊充電器原本唔屬於私人財產而拎出嚟放租，都屬於「共享經濟」？真係諗唔透。