iPhone 6瘋狂的一天

文：MenClub Patrick　　圖：MenClub
POSTED ON 19 Sep 2014

先旨聲明，反正請先達班「財演」分析後市，佢哋都未必講真話；就算真係講真話，大家都會認定佢哋專登發放假消息壓價，所以今次筆者索性唔請先達人上鏡講嘢，只係引述從各方面道聽途說返嚟嘅後市推測，畀大家做個參考。

首日報價首先當然要報番iPhone 6同6 Plus喺今日（9月19日）嘅先達回收價，不過筆者只報普遍價位，太極端高或低都skip唔提。 iPhone 6 Plus 16GB $13,000-14,500 原價 $6,388 64GB $14,500-15,500 原價 $7,188 128GB $16,500-$18,000 原價 $8,088 iPhone 6（中午起多數舖停收） 16GB $8,100-$8,300 原價 $5,588 64GB $8,600-$8,900 原價 $6,388 128GB $9,200-$9,800 原價 $7,188 首日走勢分析 1. 朝早價位大上大落勁混亂，但隨住中午過後放機人潮減少，下午啲價位已漸趨穩定。 2. 多數型號回收價高低波幅約幾百至$1,500，根據往績，以首日計其實唔算太犀利。 3. iPhone 6 Plus因貨量好少，所以回收價好穩，但iPhone 6因貨量比預期多出好多，所以好多舖頭下午已經封盤停收。 4. 因多數人係放64GB同128GB，所以後期16GB比較搶手，回收價一度出現上升跡象。 5. 3種顏色當中，以太空灰最少貨，某些型號的回收價比其他兩種色高$200至$1,000。

往後貨源 Apple Online Store：今年最唔估嘅係，喺9月12日上Apple Online Store訂嘅機，竟然有部分已喺今日送到買家手上。明天（星期六）都可能仲有少量貨送到，但星期日唔送貨，下星期一再送，到時頭一批貨應該已送得七七八八，之後嗰批可能要等到10月。 iReserve：明天（9月20日）朝早8點iReserve會再開，最快可以同日取機，之後仲可能日日開訂，到時每日都會有新貨投入市面，但數量應該唔多。台機：日日都會有人上台出到機，但隨住唔少人認為回收價不似預期，今年上台出機成本又貴咗好多，仲要放已開封台機最多會俾人扣千幾兩千蚊，所以可能會有人打退堂鼓唔劏機。門市機：會正價賣iPhone 6嘅Apple授權經銷商，啲貨一早俾排隊黨掃晒，剩低百老滙等電器舖啲炒價機又唔會有人買嚟炒，所以呢方面唔會有新貨影響放機市場。

6 Plus仲有冇得升？雖然根據往績，iPhone首賣日回收價去到頂峰之後，都會有所下調，然後喺之後幾日或者一、兩星期，因冇乜新貨應市而再度上升。但係今日iPhone 6 Plus嘅回收價已經超越晒過去iPhone嘅首日炒價，尤其係128GB炒貴咗1倍有多（以前最高峰都大約只有8成），而且冇因多人放機而顯著下調，所以再升嘅機會幾微，大家見今日下午冇乜人放6 Plus都冇再升價就可以證明。唔建議大家hold貨博升，有機可即放。 4.7吋停收有冇蠱惑？就筆者今日喺先達所見，4.7吋iPhone 6真係有好多貨，我亦親耳聽到收機大莊家拒再接貨嘅通知，所以認為唔係一般陰謀者所講，啲舖頭專登扮唔收想壓價。事實一間舖唔收，總有第二間舖收；先達唔收，都有其他地方收，根本好難聯手做市。不過，等今晚啲店舖賣走晒手上批iPhone 6畀大陸買家套現，之後又唔多人放機嘅話，收機舖自然會開番盤收機，所以持貨人士唔使心急賤價放機。之後炒乜好？出機前因為唔少「財演」猛吹128GB最好炒，所以之前無論經乜渠道入貨，好多人都係買128GB。但係以今日走勢睇嚟，128GB有出現因多人放而跌價嘅先兆，所以嚟緊仲會入貨炒嘅話，可能入16GB仲着數。至於顏色，唔少人一廂情願見上年金色5s炒得最勁，於是今年好自然都入番金色，但今日證明金色完全冇優勢，好多時回收價仲比缺貨嘅灰色低。
百老匯公然標明炒價賣機：iPhone 6 Plus由$15,800至$18,800；iPhone 6由$9,600至$11,200，炒貴了$4,012至$10,712！
7年嚟最癲！講完後市，又講番今日。自07年第一代iPhone起，每一年筆者都喺先達見證住開賣日嘅盛況，但都覺得今年係最多人逼入先達、最混亂嘅一年，原因好可能就係回收價創新高，同埋大家都知可能只炒到頭一水，所以個個一開賣都瞓身入市。估唔到經過iPhone 5同5s兩年炒勢冇咁勁之後，今年仲癲！
隨手攞出十幾疊磚頭咁厚嘅金牛都係平常事。唔止放機，問價都要排轉兩個彎嘅隊，我丢低一句「黐X線」就調頭走了。插針都插唔入，想行快步都唔得。有舖頭居然延長營業至凌晨3點，我行咗先達十幾年都未見過！放機放到要報警求助。先達對面間百老滙外面都企滿晒放機人士同收機佬，成條街block晒，要企到出馬路。今日先達所有人都淨係理價錢，iPhone 6部機係咩樣，理都冇人理，最後循例都畀大家睇吓實機啦！我覺得5.5吋比想像中大部，就算我隻手咁大，都篤唔晒成個芒，同埋拎落有啲跣手，笠番個套嚟用比較穩陣。