要數電動車優點順口都數到十樣八樣，咩環保呀靜呀之類啦；但有樣嘢電動車比汽油車輸蝕嘅，就係充電時間硬係長過汽油車入油。點搞好？Tesla話，將Superchargers充電站學油站咁加啲花臣，畀你等嘅時候有啲細藝囉。

最近Tesla CTO J.B. Straubel就喺一個食物科技論壇上透露，車主喺超級充電站平均充電時間有成20至30分鐘；為咗滿足大家嘅需要，公司計畫將美國部分Superchargers超級充電站升級擴建，加埋便利店，提供食物、咖啡、洗手間等服務，畀車主等緊充電時都可以有地方抖抖。