芒更大機身更纖薄

V30今回屏幕增至6吋，採用OLED QHD+（2,880 x 1,440） FullVision屏幕，比Note 8細少少，但就跑贏iPhone 8傳聞中嘅5.8吋芒一個馬鼻。新機繼續沿用18:9闊屏幕，但就比上一代V20仲要短8mm、窄3mm、薄0.3mm，同埋輕16g至158g，輕薄易揸手。V30搭載Qualcomm Snapdragon 835處理器，內置4GB RAM、64GB/128GB ROM，支援IPS 68防水防塵及無線充電，仲有B&O加持，配備Hi-Fi Quad DAC音效系統。

嗌一句即解鎖

一早劇透咗，V30新增聲音解鎖功能，用法係機主預錄一句解鎖語句，手機會自動辨識機主聲音同三至五個音節，成功配對就會解鎖。發佈會示範就講句：「Wakey wakey！（起身啦喂）」去解鎖，短得嚟夠響亮。依然太複雜？部機都仲有臉容解鎖、指紋解鎖同Knock Code等方法任君選擇。

懸浮式快捷列取代第二屏幕

又再一如早前流出嘅傳聞，V30飛甩標誌性嘅第二屏幕，取而代之的就是屏幕上滑動式的快捷列，最多可加入五個自選App快捷鍵，輕輕向左或右一掃就可拉出，用完又可以掃返走。Always-on屏幕亦進一步加強，除咗睇時間，仲可以開啟快捷工具或聽歌。

預設拍片影相模式

V系列賣點之一係攝影功能強勁，V30就配備雙鏡頭，包括一杖F1.6 16MP Crystal clear鏡頭及一枚F1.9 13MP廣角鏡頭，另外具備5MP廣角前鏡頭。新機加入Cine Effect，提供15款預設影片顏色效果，玩味更濃。另外亦支援Point Zoom功能，選取畫面指定人或物，即可以利用右邊的調控桿上下滑動調整縮放。就連影相嘅Manual Mode都加入Graphy功能，喺入面提供一系列示範相片，揀一張就可以自動用埋示範相片預設嘅白平衡、ISO、光圈、快門等設定，傻瓜都變大師。

「OK Google」就可影相

LG今次將喺V30上將Google Assistant進一步加強，講句「OK Google」，就可以開啟鏡頭影相或拍片、聽歌，甚至可以控制智能家電。可惜功能暫時只支援韓文，今年內會支援意大利文同西班牙文，其他語言要等等啦。