相機滑鼠　專門偷拍女同事？

文：MenClub 魏文青　　圖：互聯網
POSTED ON 05 Sep 2014

唔知大家有冇試過坐喺電腦面前，突然之間想影張相，但係又嫌用電話或者相機影完再過落電腦好麻煩，所以覺得「如果隻Mouse可以影埋相就最好啦」咁？老老實實我就冇試過，但睇黎喺日本就應該有好多人有呢個訴求，如果唔係點會有廠商出呢隻表面係Mouse，實際上係相機嘅……嘅嘢呢？

呢隻相機滑鼠黑黑實實的外表令人諗起十年八載前嘅跟機原廠滑鼠，事實上佢亦都具備一般滑鼠的功能。妙就妙在只要你一推滑鼠底部的鏡頭蓋，就會露出一個有二百萬像素的鏡頭，立馬化身做相機。拍到的照片會透過USB線直接上傳電腦，所以你應該冇咩機會用到它內置嘅2GB儲存空間。最貼心嘅係佢仲可以拍片同掃QR Code，加個咪仲可以錄音添！

呢隻滑鼠的售價為4,320Yen，折合即係HKD$320左右。除非係特務，又或者想偷拍女同事，我就真係諗唔到有咩人會用三舊幾水買隻都仲要唔係無線嘅滑鼠嘞！