司機偵測　趕絕開車拎手機

文：MenClub Patrick　　圖：互聯網
POSTED ON 25 Aug 2014

開車時唔用免提、拎住手機講電話，向來係一大車禍根源，所以一班巴西聖卡塔琳娜州大學的學生，正開發一套司機偵測系統，去趕絕呢種行為。

呢套系統的原理，係喺司機位前面安裝一個攝錄機，透過偵測司機面頰、耳、眼等部位，分析司機有冇拎住手機，一有發現就會響起警報，好似香港亡命Van超速警報咁，阻嚇司機停止講電話。個攝錄機仲能夠將司機開車的大頭畫面，無線傳送到指定平台，畀人遙距監察司機，最啱父母、老闆或租車公司，用嚟察監仔女、職業司機伙記同租車客人。

目前呢套系統已達到90%準確的偵測率，班巴西大學生正在研究再提升偵測靈敏度。不過，呢套系統仲未識偵測拎住手機睇地圖、玩app、甚至覆WhatsApp，即係對低頭族與及會同時操控幾部手機的八折的士司機無效，其實呢啲動作更加危險，更應該開發系統去杜絕！