近年Pokemon卡牌被一眾收藏家炒高，例如由Logan Paul持有嘅PSA 10分「插畫家比卡超」卡牌，上個星期就以1.3億港元成交，再創歷史新價，似乎顯示整個卡牌市場越升越有。但係根據日本媒體《每日新潮》日前報導，呢場炒卡熱潮已經進入崩盤期，各地卡牌店相繼執笠，市場上甚至已經出現取代卡牌嘅另一個炒賣品項。

話說《每日新潮》留意到早前喺東京開到成行成市嘅卡牌鋪，好多都已經關門大吉。為咗了解原因，佢哋就去訪問咗卡牌店老闆。其中一位老闆表示，以過去曾被無數YouTuber及名人追捧嘅「加油莉莉艾」為例，其成交價已經由高峰嘅1000萬日元（約HKD$ 51萬）回落至200至250萬日元左右（約HKD$ 10至13萬），縮水幅度接近八成。亦正因為卡牌價值大上大落，令好多卡鋪店主支持唔住，最後只能結業。

據報導指，好多新興卡牌鋪嘅老闆係靠興趣而開鋪，根本就無炒賣嘅心態及入貨出貨相關知識，結果好多時高價收牌之後因為期待會再升而死都唔放，到牌價跌時又走唔切，造成鉅額虧損。另一方面，買家嘅人好多係「真炒家」，眼見卡牌價值下跌就開始大手放貨，令市場存貨過剩，價格就進一步下跌。

而第三個問題，就係假卡問題越來越嚴重，唔單止卡牌本身可以造到以假亂真，就連第三方認證機構（如PSA）嘅鑑定保護殼都可以有假。受訪店主表示：「卡牌唔似貨幣或股票，本質上就係玩具，根本無任何防偽機制，一般店主有咩可能分得出真假？萬一買錯假卡隨時就蝕幾十上百萬日元，所以好多卡鋪根本唔敢入貨。」經營空間越收越窄，自然就有大量卡鋪結業。

與此同時，日本近年亦掀起一陣「貼紙熱」，就連以往靠炒卡賺錢嘅黃牛都改為「炒貼紙」，令Pokemon卡牌主場熱度進一步下跌。不過該名店主就視呢個改變為健康發展：「隨住大家關注度下跌，卡牌終於回到合理嘅水平，曾經賣5萬日元嘅卡，依家5000日元就可以買到。只要小心規劃下零用錢，小朋友都可以擁有夢寐以求嘅卡牌。」對於真正嘅愛好者黎講可能係好事。

資料來源：デイリー新潮