對於大多數電影嚟講，全球票房收得14億美元絕對係值得開香檳慶祝嘅天文數字，但對於由James Cameron執導嘅《阿凡達》系列而言，呢個成績可能只係勉強「打個和（Break-even）」。即將在全球院線落畫嘅《阿凡達3》，雖然穩坐2025年票房季軍，但相比起前兩集嘅輝煌戰績，今集回報率明顯下跌，亦令迪士尼高層開始重新評估，原定2029及2031年上映嘅第4、5集係咪仲應該繼續拍落去。

截至目前，《阿凡達3》全球票房約14.4億美元，以現今電影市道嚟講絕對係壯舉。但對比起當年首集嘅29億票房，以及第二集《水之道》嘅23億票房，今集明顯有一段距離。更關鍵嘅係，據報《阿凡達3》製作連宣傳費合共高達5億美元，而James Cameron早在2022年已透露，呢個系列要收夠15億美元先可以收支平衡。換言之，《阿凡達3》單靠院線收入可能只係僅僅夠維皮，不過迪士尼仍然可以透過Disney+、家庭娛樂市場等其他管道補回收益。

據外媒《Variety》分析指，除咗製作成本龐大之外，「性價比」亦係一大問題。相比起《阿凡達3》要燒5億成本，同年迪士尼推出嘅兩部合家歡電影，真人版《史迪仔》同《優獸大都會2》，成本分別只需1億同1.5億，但同樣錄得破10億票房，而且周邊商品銷售方面極具吸金力。相反，《阿凡達》唔係細路仔嘢，玩具及授權商品銷情相對有限，迪士尼最多只能寄望電影帶動遊客前往主題樂園拉上補下。

除此之外，唔少影評同市場分析亦都指出，《阿凡達3》劇情同第二集太相似，缺乏咗當年首集嗰種「視覺震撼」同技術突破。加上今次兩集只係隔咗3年就上映，減弱咗過往嗰種「十年磨一劍」嘅期待感。

如果想《阿凡達》第4、5集想順利開拍兼提升盈利能力，最直接嘅方法自然係壓低製作成本。不過James Cameron拍戲出晒名非常燒錢，由當年《未來戰士續集》到神作《鐵達尼號》，再到成個《阿凡達》系列，幾乎每部作品都打破當時史上最昂貴製作紀錄。喺佢字典入面，似乎從來無「預算上限」呢樣嘢，只有力求將視覺效果做到極致。（例如《鐵達尼號》當年超支，佢自願放棄片酬，換取片商唔刪減電影長度。）

雖然佢過往多次以票房證明自己實力同眼光，甚至令「Never bet against James Cameron」成為行內名言，但面對不斷縮減嘅利潤空間，迪士尼會否繼續願意投入巨資開拍《阿凡達》續集，仍然存在變數。而如果減縮預算，呢位追求完美嘅「大花筒」導演又會唔會接受，咁就要睇下雙方傾唔傾得掂數。