早前Disney於一年一度嘅D23上公佈《Toy Story 5》預告，但相信唔少人睇到消息嘅第一反應都係「又有？」。事實上唔少系列Fans都認為2010年嘅《Toy Story 3》已經係最佳結局，之後嘅《4》已經有人質疑必要性，到依家《5》質疑聲就更加大。對此《5》嘅導演Andrew Stanton近日接受外媒訪問時，就話：「大家可以唔睇。」

先旨聲明，Andrew Stanton嘅實際意思其實唔係字面睇落咁串。首先你要知道Andrew Stanton曾擔任《Finding Nemo》、《Wall-E》、《Finding Dory》等Pixar電影導演，而且係《Toy Story》系列元老之一，目前推出嘅4集《Toy Story》全數由佢負責故事創作。所以佢對系列嘅發展絕對有發言權。

而日前佢接受《Empire》訪問時嘅原話其實係：「第三集係安迪時代嘅完結。無人打算拎走呢個三部曲，大家鍾意呢三集的話亦可以唔睇後面呢啲。但我喜歡呢個世界容許我哋去擁抱時間及變化，無人承諾過佢會如封鎖於琥珀一樣永遠不變。」

演繹一下佢嘅說話，就即係時代變咗，玩具嘅定義及意義亦會改變，於是就有空間讓故事繼續發展。事實上從《5》嘅預告中亦可以見到，新加入嘅角色乃係一部兒童平版電腦「Lilypad」，明顯係要探討新科技對小朋友嘅影響，喺呢個小朋友好可能「食Mon大」嘅年代，的確頗能引起共鳴。

Andrew Stanton亦指出《5》其實係一次「存在意義式」嘅探討：「科技改變咗我哋嘅生活，而我哋要問嘅係，對我哋，以至對小朋友們有咩影響。我哋唔可以簡單哋將科技當係反派。」

資料來源：EMPIRE