小島秀夫及其小島工作室為咗慶祝成立十週年，日前就舉行咗個直播活動，並公開Xbox平台上嘅新遊戲《OD》、PS平台嘅新遊戲《Physint》，以及《Death Stranding》動畫《Death Stranding: Mosquito》等情報。不過要數當中最新鮮嘅，或者就係宣佈會同《Pokemon Go》開發商Niantic Spatial開發新嘅AR實境遊戲，小島秀夫仲話會「好似真人版《Death Stranding》」，係咪代表玩家要於真實世界送貨啦？

雖然目前直播中只係播出上面呢條長約兩分鐘嘅宣傳片、小島秀夫亦講到明「我唔可以講太多細節住」，但從其發言以及影片中亦可以推測遊戲嘅玩法。小島秀夫表示呢隻AR實體遊戲係「就算你去爬山，都可以有娛樂性。就好似於現實世界中嘅《Death Stranding》一樣，你可以與人連結，亦可以與你所在嘅真實城市連結。」另一邊廂，Niantic創辦人John Hanke就表示：「故事素來是將人類凝結在一起的方法，而科技能夠成為助力…遇上具啟發性的創作者，會成為世界的重要推動力。」

就咁睇，呢隻Game將會同《Pokemon Go》一樣要求玩家於真實世界中走黎走去，不過玩家目的就唔係捉精靈同打道館，而係走訪不同鏡點並完成任務或收集物品。而比起《Pokemon Go》以收集為主要目的，小島秀夫嘅新Game似乎會有故事推動玩家。

從公開嘅宣傳片中，亦可以見到「In the near future」、「Move Beyond the screen」等字眼，同時亦可見到片中人爬上山頂拍底標高柱，似乎係完成咗某個任務。更值得一提嘅，係影片尾聲出現另一個疑似敵人嘅真實玩家，係咪代表遊戲會有「真人對戰」嘅成份？反正小島秀夫嘅創意加上AR技術，應該會成就一隻非常有新意嘅遊戲。

資料來源：IGN