早前有消息指，Lucasfilm主席Kathleen Kennedy將於今年底合約到期後正式退休，令唔少星戰迷欣喜若狂。不過，近日Kathleen Kennedy親自出面澄清，表示自己並冇計劃退休，但就承認一直同迪士尼物色緊接班人。

Kathleen Kennedy日前向外媒《Deadline》回應退休傳聞：「真相係，我想大聲並明確地表示，我唔會退休。我永遠都唔會從電影界退休，我會拍電影拍到死嗰日為止，呢一點非常重要。而Lucasfilm目前嘅情況係，我同Bob Iger（迪士尼CEO）及Alan Bergman（迪士尼影業聯合主席）已經傾咗一段時間，商討接班人嘅安排。我哋公司有一班出色嘅人才，預計喺未來幾個月或一年之內正式公布繼任人選。」仲話就算自己卸下Lucasfilm主席一職，佢都會繼續留喺公司幫助新任主席。同時強調就算落台，都係百分之百由自己決定，並唔係被人炒魷魚或趕走。

雖然Kathleen Kennedy並未透露繼任人選名字，但就向記者分享《Star Wars》未來計劃安排，表示自己正忙於製作下一部星戰電影《The Mandalorian & Grogu（曼達洛人與古古）》，預計2026年上映。而緊隨其後就係一部由《Deadpool & Wolverine（死侍與狼人）》導演Shawn Levy操刀嘅未定名新作，故事發生在第九部曲《The Rise of Skywalker（天行者崛起）》之後嘅5-6年。以上兩部電影都係由Kathleen Kennedy所監製。

除此之外，Kathleen Kennedy亦提到《X-Men》系列製作人Simon Kinberg，現正為星戰系列撰寫一套全新三部曲劇本，而且進展非常順利，預計今年6月左右就會有些眉目，並宣稱呢個全新篇章，將會引領大家踏入傳奇嘅新一頁。