無人機製造商 DJI 日前正式發布全新單手持無反相機雲台 Ronin-SC (SCompact)，今代 SC 雲台比上一代 Ronin-S 最大分別係採用咗輕量化設計，機身用上鎂合金及高強度複合材料製成，體積較 Ronin-S 減低約38%，機身僅重2.4磅 (1.1 Kg)。另外，SC 雲台新增咗手機體感控制功能，而售價亦都更親民。

DJI 新發布嘅雲台 Ronin-SC 機身由輕便嘅鎂合金與高強度複合材料製成，除咗堅固耐用，SC 機身僅重 2.4 磅，體積較上代 Ronin-S 減低約38%，拆卸後可輕鬆放入背囊及行李箱。

SC 雲台強大嘅高扭矩電機有高達4.4 磅載重，電池可以提供長達11小時續航時間。硬件細節方面，Ronin-SC 配備三軸機械鎖，可分別鎖定雲台三個方向軸臂。

Ronin-SC 除咗保留 Ronin-S 嘅拍攝模式，仲增加咗手機體感操控 (Force Mobile) 及智能跟隨 3.0 (ActiveTrack 3.0) 等新模式。其中 Force Mobile 功能與體感操控類似，使用者可以將 SC 連接手機後轉動手機控制雲台轉向，並透過藍牙 5.0 連接，支援最遠82英呎雲台操控。

Ronin-SC 單機與專業套裝同步發售，單機售價為$2,599港元，專業套裝售價為$3,299 港元。