中美貿易戰火重燃後，中國手機製造商華為受到重點招呼，繼上星期四美國商務部出手列華為入出口管制實體名單。不過一不離二，據《Reuters》報道指出 Google 已經終止華為嘅部分業務來往，華為手機目前已失去 Android 作業系統更新資格，而且唔可以用 Google Play、Gmail 等 Google 服務。

今次華為失去咗 Google 呢個重要合作伙伴，最受影響相信係華為嘅海外手機業務，雖然華為手機仲可以使用「公開源碼」嘅 Android 作業系統，但用家就無辦法更新 Android 系統，同時海外用家經常使用嘅 Play Store、Gmail、Google Map 等 Google 服務就無得用喇。不過今次終止合作對中國內銷市場相信影響不大，因為 Google 大部分服務根本喺中國係無得用。

除咗《Reuters》報道外，外國科技網站《The Verge》執行編輯 Dieter Bohn 亦於Twitter上發文表示，已經證實 Google 因應美國商務部新規定中止與華為嘅直接業務活動。貿易戰嚟到目前戰況，華為驚完之後睇嚟 Apple 都要開始驚，因為中國唔知幾時會推出反制措施搵 Apple 祭旗。

來源：The Verge