NASA(美國太空總署)喺大約4年前展開咗一項名為「Human Research Program」嘅人類研究計劃，當時NASA將一對退役太空人「雙胞胎」實驗分別送上太空及留在地球一年，以觀察兩人生理變化，而呢個標誌性研究結果終於出爐，由太空返回地球嘅Scott Kelly身體竟然有一部分無法復原。

NASA自2015年3月27日至2016年3月1日期間，將孖生太空人弟弟Scott Kelly送上太空，而哥哥Mark Kelly留喺地球上分別進行人類研究計劃。日前NASA研究團隊喺《Science》期刊上發表研究報告指，55歲嘅退役太空人Scott Kelly於國際太空站連續逗留340日期間身體出現咗唔少變化，其中包括頸動脈與視網膜增厚、體重減輕、腸道微生物有增減、認知能力降低、DNA損傷、基因表達出現變化，以及染色體末端端粒拉長。

科羅拉多州立大學博士Susan Bailey嘅團隊發現，Scott與Mark展開一年太空研究前染色體端粒長度非常接近，但Scott喺太空站逗留期間染色體端粒顯著增長。不過Bailey警告，呢項發現唔能夠被視為青春泉源，以及人類能因待在外太空而活得比較長，此外Scott返回地球後，染色體端粒長度非常快速地縮減。

雖然Scott喺太空逗留期間身體出現變化，但佢喺返回地球嘅6個月後，大部份身體恢復正常，不過免疫系統及DNA修復未能恢復正常，以遺傳基因而言，呢種情況代表潛在嘅長期損傷。研究人員認為，令基因變化嘅幾種可能原因，包括太空輻射、零重力環境無重狀態，以及國際太空站運行軌道於地球保護磁場之外，位於帶有大量高能帶電粒子Van Allen輻射帶嘅下方。

來源：Engadget