華為呢期出晒位就係人都知，不過大家又有無聽過佢哋旗下獨立品牌HONOR？一向於中國、歐洲及東南亞市場銷售嘅HONOR，喺今個月正式於香港發售旗艦手機HONOR 10，即刻睇吓呢部外型同規格都與Huawei P20相似嘅HONOR 10係點。

雖然HONOR係華為旗下嘅子品牌，但HONOR 10完全無華為嘅Logo、名字，不過HONOR 10外型同Huawei P20非常相似，同樣有M字額嘅5.84吋瀏海螢幕，解像度達2,280×1,080 FHD+，螢幕底部仲有指紋辨識按鍵。而機背方面用上咗漸變嘅設計，今次筆者收到嘅係「幻影黑」，大家都可以睇到機背喺陽光下有漸變嘅效果，同時佢仲有「幻影藍」顏色提供。

至於鏡頭方面，HONOR 10配備16MP+24MP AI雙鏡頭，能夠實時識別22個範疇嘅500多種物件，仲可以玩AR貼紙、AI美顏、影棚燈等特效。而24MP嘅前置鏡頭同樣支援AI 2.0技術，以及具備3D人像識別功能，可以精確度定位偵測超過100個面部角點，凸顯臉部輪廓。

於12月5日推出咗嘅HONOR 10價錢只售港幣2999元，不過佢就採用咗華為嘅頂級Kirin 970 AI 8核CPU，配上4GB RAM及128GB儲存空間，絕對可以應付日常睇片、打機嘅需要，加上佢仲有華為嘅GPU Turbo加持，性價比嚟講非常高！