拍電影要好器材，拍荷里活電影更加要用上頂級器材，不過電影製片人Glenn S. Gainor用行動話你知其實並唔係咁！上月底喺美國上畫嘅荷里活驚悚電影《The Possession Of Hannah Grace》只用上Sony嘅全片幅無反相機a7SII拍攝，製片人仲話用a7SII「慳錢、慳力、慳時間」。

近年全片幅無反相機越嚟越普及，而且性能及便攜性都大大提升，Canon及Nikon等傳統相機大廠都趕上推出全片幅無反相機。喺11月30日於美國上畫嘅低成本荷里活驚悚電影《The Possession Of Hannah Grace》就用上咗Sony嘅全片幅無反相機a7SII拍攝。

電影製片人Glenn S. Gainor表示，為咗令電影攝製隊喺緊湊嘅拍攝流程中搵到新思路，所以佢決定喺電影中用上Sony a7S II及大尺寸嘅Vantage Hawk 65 Anamorphic鏡頭拍攝整部電影。

Gainor指出，佢睇中Sony a7S II有全片幅傳感器，並且能夠拍攝4K影像，加上器材成本比起傳統荷里活電影低得多。而且喺拍攝過程中會有6個鏡頭進行拍攝，喺器材成本低下攝製隊可以用上分別裝有6個鏡頭嘅a7S II相機同時拍攝，連換鏡嘅時間都氣力都慳埋。

今次電影中用上嘅Vantage Hawk 65 Anamorphic鏡頭喺拍攝時有1.3倍嘅壓縮，令到攝製隊可以喺a7SII嘅16:9傳感器上拍攝出2.40:1嘅寬畫面。不過攝影導演Lenner Hillege就指出，用Sony a7SII最大挑戰係相機嘅8-bit壓縮，因為同平時嘅常規拍攝方式唔太一樣，但最終電影呈現嘅效果都相當壯觀。

來源：Engadget