職場雖大，好上司卻寥寥無幾，其實打工仔都唔奢求遇上好上司，只求上司正正常常，唔好搞太多無謂野，由得我地工作時間努力工作，放工之後盡情玩樂，已心滿意足。偏偏有些上司，係都要扮好人，講埋晒一些以為關心的說話……

「今晚唔好做到咁夜啦！」

上司，你唔使加班，唔係因為你工作能力高，係因為你將你的工作，分派晒俾我地做，所以你可以放工先，我地就要晚晚加班到天昏地暗！所以，請你放工快點離開，唔好講無謂說話，因為唔係你的話，大家都唔使加班！

「呢件事好簡單，一日都做得晒。」

上司，究竟你有冇曾經做過，或者了解過件工作係點做？係想做到咩效果？因為唔使你做，所以你覺得好簡單好易做，但其實要做好它，係需要時間與精神！唔係怪你將工作安排給我們做，但請別覺得每項工作都好易做。

「你個建議好好，不過可以再執執佢。」

上司，如果個建議真係好好，仲有甚麼地方要執？如果有地方要改善，就唔好咁假話好，而且，可否講講甚麼地方唔好？有甚麼要求？我唔係你肚裡面條蟲，你唔講，我唔知你想點，執極都唔會係你想要。

「呢餐慰勞lunch，我俾$500啦！」

上司，我地團隊有十幾人，請問你咁大手筆俾$500慰勞大家，係咪想請大家食麥記超值套餐？你請唔請食飯，我地冇所謂，但唔好覺得自己俾左$500，就要我地覺得你大恩大德沒齒難忘。

「放假好好休息下喇。」

上司，我放假能否好好休息，最關鍵係你唔好在我放假的時候，打電話或whatsapp我，可否俾我有一個完全沒有你存在的空間，好好享受一下？

「不如搞個BBQ，等同事輕鬆下。」

上司，其實我地一直都有工餘時候相聚輕鬆下，如果你真係想我們可以輕鬆，不如減少我地工作量，應該係將大家的工作量變回正常份量，咁我地就可以輕鬆下。