由Rachel Zegler主演嘅真人版《白雪公主》自宣布選角以嚟就爭議不斷，電影上映後更加係票房同口碑雙雙仆直。面對排山倒海嘅負面聲音，Rachel Zegler近日接受訪問坦言，影迷嘅批評令佢感到「非常困惑」，但同時企硬表明立場，強調自己絕對唔會為迎合別人而改變自己。

Rachel Zegler日前接受《Harper's Bazaar》雜誌專訪中提到，自己經常因為膚色同種族受到攻擊：「有人話我演《西城故事（West Side Story）》嗰陣唔夠某種特質（因為爸爸係白人而被批評唔夠拉丁味），但到我演《白雪公主》嗰陣又話我太多另一種特質（被指唔夠白）。對一個廿歲出頭嘅女仔嚟講，聽到呢啲說話真係覺得好困惑。」

即使面對猛烈抨擊，佢依然為自己嘅血統感到自豪：「我由細到大都以身為哥倫比亞人為榮，食哥倫比亞菜、著哥倫比亞傳統服飾、飲哥倫比亞咖啡。但喺公眾眼中，當你同時擁有兩種身份時，往往會被當成『咩都唔係』。」並強調：「但我拒絕為迎合別人而改變自己」

除咗選角風波之外，Rachel Zegler早前喺《白雪公主》宣傳期間，因為喺社交平台發表「Free Palestine（解放巴勒斯坦）」言論而惹來猛烈抨擊，甚至收到人身安全威脅。回顧呢件事，佢形容係一次「動機與影響嘅徹底教訓（a complete study in intent versus impact）」：「人總要從經歷中學習，然後自然變得更加謹慎。有時就算你好有衝動想出聲，都唔代表真係一定要講出口，而且比起喺網上出個Tweet，其實仲有好多方法去促成更有意義嘅改變。」佢亦坦言，如果一早預計到會惹嚟咁多麻煩同威脅，佢當時一定會「將部電話掟落海」，仲話相信任何理智嘅人都會咁做。