大陸過江龍

由上年年尾登陸香港的卷福，專食膽顫心驚的小龍蝦，大陸品牌就如每日多過150人嘅單程證配額一樣，港人抵檔不了，所謂的「過江龍」（深圳河不是江）品牌遍地開花，如海底撈、蜀大俠、卧龍正宗、劉一手等等在內地大型連鎖規模的餐飲品牌，幾乎在下半年狂攻香港麻辣火鍋市場，與此同時，當麥當勞的公司文件變為「金拱門」，喜茶有沒有「東」，許留山一早收歸黃記煌，大陸品牌的滲透力依然不容視。（按：又多咗間乜乜「桃園眷村」....台灣名但其實上海牌子....）

香港人打（邊爐）不死

打邊爐是香港人的本命，雖則說頭先講到大陸品牌幾乎強佔香港的麻辣火鍋，火鍋界反而出現百花齊放的局面，除了麻辣火鍋，相當自私的台式一人鍋（係囉吉野家都有出一人鍋啦）、由懷舊冰室伸延到火鍋店的舊香港主題，或者係另一款極合我心水的潮汕牛肉火鍋，還有一堆走高檔路線的精品火鍋，齊集咁多鍋，先至係香港的鍋流。

肉界韓（牛）風

雖然香港的男同女睇韓國的男同女，都戴上左一副或數副嘅有色眼鏡，流行文化我唔評論（不過恭喜Sana@Twice入咗百大靚女榜～），韓國牛肉先係我在乎的食材，本身韓牛只做內銷，自15 年底解禁後，經過1年消化，終於在港活躍起來，到處可見。韓牛分級為 1++、1+、1、2、3，1++ 就最靚，講牛味可比美國牛，講肉質細嫩又可比日本和牛，「燒山」又成功引入濟洲韓牛，自己一條龍做埋批發同零售，價位亦相當親民，難怪在港大紅。

素食再進化

食素已經不再是初一十五才一餐的舉動，本地"Green Monday"的風氣已愈吹愈盛，不論是追求健康的OL，顧及一家大小的家庭煮婦，走到街上，愈來愈多餐廳自願供應素菜Menu。再加上我們走進素肉2.0 的年代，素肉經過一次又一次的科研改進，愈來愈脫離「素肉」的模樣，首推Bill Gates 有份投資 "Beyond Meat"，本地綠色餐廳Green Monday 引入系列中的漢堡肉，你食過就知完全唔似素肉，塊漢堡仲有汁嫁痴線，你唔會估到係黃豆做，一切一切，都係想你食多少少素姐。

日本集團收購譚仔三哥

人人都食譚仔，身邊同事甚至去到日本依然嚷著要「勿演畜牲爽美凍練茶」，猶如奪去你初夜的浪子，你的心，你的食慾，無時無刻牽掛住，我同佢講：「日本遲早開嫁啦。」日本東利多控股，即「丸龜製麵」的母企，繼5月收購「譚仔雲南米線」，然後12月收購埋「譚仔三哥米線」，控制香港人米線市場的70%。網民講笑話擔心會改名做「譚仔三哥太郎」，不過我話一定要請返有口音嘅阿姐囉！

《米芝蓮指南》十週年

唔講唔覺，原來《米芝蓮指南》已出版咗十期，十年光景，港澳星級餐廳的數目，在十年間上升了三倍，見証與掌握香港飲食潮流發展的脈絡。不論影響高端Fine Dine的星星，或是把小店拉入鬼門關的街頭小食清單，當然也令多間食肆聲名大噪，開到西半球的添好運、十年奪星的龍景軒，甚至是剛獲意大利頒與騎士勳章，8½ Otto e Mezzo BOMBANA 的BOMBANA，都是令人仰望的出色餐廳。

外賣Apps大戰Deliveroo成本地龍頭

香港人愈來愈懶，還是外賣Apps愈來愈方便，我望唔透，如果你住喺港島，我諗你一個月一定有一次用過外賣Apps。香港市場的外賣Apps，計落不多過十個，當中以Deliveroo成本地龍頭，市場佔有率達55至60%，相當誇張。其進擊的策略包括「戶戶小廚」的服務，以中央廚房形式與餐廳合作，甚至推介外賣限定餐牌，最初我都以為家住沙田的我，永遠都唔會覆蓋到，點知尚欠元朗、屯門及西貢區，就能做到全覆蓋，預計2018年內達成，相信好難有勢力能撼動其地位。