{ SKIP }
文:MenClub Simon Tse
POSTED ON 26 Jul 2019

90年代的馬路英雄又豈只豐田Corolla GT-i 16?本田EG系Civic「大Tec」亦是常客,那些年的VTEC的確造就不少英雄事蹟,即使眼前這部行貨EG9已有25年車齡,但依然好跑得,車主將它珍而重之,拍完這段車片之後,便會收埋入倉,等下次有機會才開出來活動筋骨!

上世紀的事,就是千五cc家庭車曾經是一個熱門市場,情形就如現時的7人車和SUV一樣,不過那時的家庭車還有點「血性」,好似今日介紹的本田Civic VTi(車身編號EG9),亦是代理當年第一次引入的行貨「大Tec」,1.6公升VTEC引擎有160匹馬力,威震全港大小馬路,公主道、龍翔道、深淺赤石都有佢份。

眼前的EG9是1994年行貨,所以車名叫Civic VTi而不是日版的Civic Ferio SiR,另外當年代理也只入了一款四門「大Tec」,反而冇引入最多人想玩的EG6,即是三門的Civic SiR。雖然如此,但有部EG9已經對得住香港車迷。

說回那年代的Civic,的確有很多突破性的設計,例如這部EG9,後座是獨立雙座位設計,那年代的日本車已玩到這樣子,你話望住現時的日本車真係情可以堪。再者,同期的三門掀背已經採用上下開合設計,方便提取行李之餘,又夠有型。至於後期行貨引入的千五「細Tec」EG8,前座採用單搖臂式頭枕,又係一絕!

當年為了這條VTi專用頭唇,專登跑到大昌零件部買番一條裝落我部千五「細Tec」EG8身上。
從前的日本車設計已經好高質,唔好話邊個抄邊個,但這個流線形倒後鏡的設計的確一絕!
那些年的EG「大Tec」有專用軨冚,當年我都想買一套,不過車主為了落track day方便,所以換了軨及改了鮑魚和大碟。
EG「大Tec」的專用尾翼,有型又實用,當年我都買左條「老翻」,將EG8扮EG9。
車廂布局都算好原裝,只是換了軚盤和「波的」,唔好睇少這個已經絕版的無限軚盤,車主表示已經炒到好貴,賣一隻少一隻。
這個三圓表板認真夠經典,留意紅區到8,000rpm轉之後。
四隻車門都是電窗,那些年也是賣點之一。
車主將原本收音機位置,換上了三隻Defi表,用來睇溫度和壓力。
儘量保留原裝的車主,嫌原裝桶椅的椅架太高,所以迫於無奈換了。
絕對是有今生冇來世的原裝後座獨立雙座位設計,那時已覺得驚為天人,現時睇番更覺吸引!

原裝的EG9引擎是一代名機B16A的1.6公升DOHC 16活瓣VTEC引擎,馬力有160匹(行貨規格,日版有170匹),突破每公升100匹馬力輸出的樽頸,而且引擎表現偏向高轉,就是那種愈高轉愈精神。25年過去,跳上車將轉數扯上7,000rpm轉以上,引擎精神得無與倫比。或者你會話車主因為已換了電腦和EK9的「大遮」,所以反應好好,但無可否認這台引擎的活潑性是同類NA引擎中最好。

另外,即使試車已換了彈弓避震,但調校得極好,日常行街又不會太跳,而前後雙搖臂的懸掛設定又能夠時刻將車輪緊貼路面,為這年代的EG提供了極極極之好的抓地能力,能夠在多彎的路段上放爆Corolla不是沒有道理。


滄海遺珠
當年有不少本田產品都有雙門Coupe型號,例如Accord,所以有Civic Coupe也不意外,這些雙門Civic都是美國生產,並以美加等地為銷售市場,不過亦有出口至歐洲市場,甚至以逆輸入身份回流到日本市場,成為最罕的EG。

引擎:直四, DOHC, 16V, VTEC

排氣量:1,595cc 

馬力:170ps/7,800rpm

扭力:16.0kgm/7,300rpm

傳動:五前速手波

驅動:前置引擎;前輪驅動

制動:通風碟(前);實心碟(後)

懸掛:雙搖臂(前);雙搖臂(後)

尺碼:4,395 × 1,695 × 1,375mm

軸距:2,620mm

車重:1,090kg

「買得Polo,好心你俾多些少買Golf 1.4(150匹)啦!」 我多事,加把咀「咁買得Golf 1.4,點解又唔添多啲買GTI或Golf R呀?」 好在,地球仲有好多小車fans,亦都有個叫Volkswagen嘅老招牌 繼續陪佢哋癲,推出好似Gol ...
autoreviews
【一公升Turbo當道】Volkswagen Polo 1.0 TSI
06 Nov 2017
「而家啲車唔靚」已經流傳於環球車迷口中約20年。 我唔敢話將近2018呢刻,全球車廠已覺悟前非,部部新車皆「靚女」,但近年,德國、日本都有唔少令人睇得舒服順眼,又獨具風格嘅新盤。 包括今次MenClub到德國試駕嘅V ...
autoreviews
【不用看藍天碧海】Volkswagen Arteon
03 Nov 2017