平治（Mercedes-Benz）首個Pick-up車系X-Class昨晚發表，講過都要講多次，X-Class係平治同日產嘅合作項目，日產嗰邊稱之為NP 300 Navara，兩款車都會喺西班牙Navarra嘅日產生產線製作。

主理X-Class開發項目嘅仁兄，原來就係久違了嘅AMG前頭目Volker Mornhinweg，佢正正係10年前C 63 AMG計劃嘅幕後主腦。

Volker Mornhinweg（前排左）

一講到Pick-up，好多人都覺得：「個樣係幾型仔嘅，但乘坐感唔夠舒服，單身一族冇問題，有家室就可能『要睇人面色』」。X-Class雖然都係配Pick-up嘅陣型車架，但前搖屬雙搖臂格局，後懸後多連桿型式，四隻角都係配圈型彈簧，唔係好似福士Amarok同福特Ranger咁，後懸仲係葉片彈簧（Leaf Spring）

外形呀，內櫳呀，呢兩樣你自己睇短片嘞，我覺得今次平治呢幾套X-Class短片就拍得好好，定位好準，風景亦好靚，連我呢個「非Pick-up粉」都睇到有少少發姣，突然到X-Class好有feel。

不過，睇見廠方現階段公布嘅X-Class引擎配搭就唔多Like，唔係話平治偷懶交唔足功課，而係最正嘅機器，清一色都係柴油引擎，例如頂級版所配嘅258匹V6柴油Turbo引擎，呢款引擎已應用喺G-Class同最新嘅E-Class。另外有啲2.3直4 Turbo引擎，馬力分別為163匹同190匹，可惜都係「飲」柴油。

唯一嘅電油引擎，165匹，本來想收貨ok啦，點之只配喺左軚版本，而且只對應後輪驅動級別。

咁即係：唔使諗啦。Volker兄，想請問將來X-Class會唔會有AMG電油版？

諗諗4.0 V8 Twin Turbo吖，我有窿路可以出張每公升平$5嘅油卡。