今日你能夠上網睇到呢個Post一定要感謝一個人，佢就係「光纖之父」高錕。諾貝爾物理學獎得主兼中大前校長高錕，昨日於沙田白普理寧養中心與世長辭，享年84歲。雖然高錕離開咗我哋，不過佢亦留低咗可以傳送大量資訊嘅光纖，大家過中秋之餘不妨睇吓高錕嘅偉大發明—光纖。

1933年喺上海出生嘅高錕，出身於書香世家，佢嘅祖父高吹萬係清末江南著名書畫家，而父親高君湘律師就係美國密西根大學法學院博士，而高錕就自小對化學及物理有興趣。喺1966年高錕發表咗一篇名為《光頻率介質纖維表面波導》嘅論文，破天荒咁提出以光導纖維應用於通信上，並描述咗長程及高信息量光通信所需絕緣性纖維嘅結構及材料特性，啫係只要解決玻璃純度及成分等問題，就可以利用玻璃製作光學纖維，並高效傳輸信息。呢個重大發明誕生之後，高錕並無將光纖技術申請申請專利，反而留畀後人免費使用，所以高錕非常值得大家尊敬。

喺2002年高錕證實患上早期認知障礙症，逐漸忘記自己所發明嘅光纖，甚至唔記得自己，不過世人都會記住佢為大家留下嘅偉大發明—光纖。而中大校長段崇智亦表示，「高錕為人類通訊史寫下全新一頁，其離世對香港乃至全球學術界均是重大損失」。