電競(電子競技)等於體育？相信呢條問題開上百場諮詢論壇都唔會有結果，加上香港連正規體育選拔都搞到有私相授受之嫌，好難令香港人對電競呢種新事物有深入認知，不過有一樣嘢可以肯定嘅係，電競同大家平日打機係兩回事，同一隻game可以係打機，亦可以係電競，今次淺談一下當中分別。

喺8月舉行嘅雅加達亞運中，電競成為咗示範賽之一，不過連其他主要項目都缺乏大眾關注下，相信留意嘅只有一小撮關注電競項目嘅活躍分子留意。正因為咁，推動電競專業化、大眾化更需要各方面推動，喺香港體育界紮根多年嘅南華體育會與電競企業ER Esports合作舉辦咗一系列嘅電競課程。

負責電競課程嘅林天偉舉例指，一般人都會認為喺NBA打籃球，同一班人喺街場比賽係有好大分別，而電競亦可以套用同樣道理。因為電競係有規律性、目標性，而且需要兼顧體能，以及日常營養攝取等。林天偉指出，更重要嘅一點係，電競係唔可以講「粗口」，相信大家平時打機有時都會唔小心口快快講咗「粗口」自己都唔知，不過電競同一般運動都一樣，非常講究紀律性，加上電競同時顧及到情緒、心理壓力等問題，呢啲都係打機好少顧及嘅地方。

電競未必同家想像中一樣咁好玩，ER Esports舉辦嘅電競工作坊中，以早前新推出嘅Overcooked 2為切入點。相信大家有玩過Overcooked 2都可能會鬧交，不過工作坊中安排大家先喺完全唔溝通嘅情況下完成關卡，成績當然係一般，而且搞到個廚房火燒連環船咁。當第二次玩嘅時候大家可以先討論策略，例如分工、目的等，而目的包括阻止對手上菜，當你了解到自己嘅遊戲角色、目的，你就可以好專注咁完成任務。工作坊以大家都會玩嘅遊戲作切入點，就係要話畀大家知一隻普通遊戲都可以訓練電競，在於嘅唔係遊戲本身，而係你用啲咩方式對待遊戲，從而訓練出合作、紀律要素。

另外，其實賽車喺今年已經正式成為香港奧委會成認可運動之一，ER Esports同時喺南華會提供咗科技結合運動嘅平台，設置多部賽車模擬器提供電競賽車嘅訓練。飄移高手陳子健指出，電競賽車喺香港其實好有發展潛力，事關賽車模擬器非常真實，賽車電競手可以透過賽車電競成為真正職業賽車選手，而且用模擬器訓練嘅成本非常低，例如飄移係非常「燒錢」嘅賽車項目，就可以透過電競嚟訓練。

南華體育會及ER Esports嘅合作，將南華會10樓壁球室變為電競學院，開辦涵蓋多元化嘅電競課程，由技能去到心理層面皆都會顧及。同時南華會1樓嘅電子競技中心，集合咗VR 遊戲、電競賽車等設施，並有酒吧提供。

電競課程及電競賽車課程內容：

[四大電競產業範疇] 

1. 電繪

2. 多媒體編輯

3. 編程

4. 主播及評述

[課程] 

1. 專業賽車手訓練課程（賽車）

2. 專業賽車手訓練課程（飄移）

3. 兒童電競綜合初級體驗課程

4. 電競主播及評述體驗課程

5. 電競剪片體驗課程

6. 電競賽事策劃體驗課程

7. VR體驗及硬件認知基本課程

8. 初級電競探索訓練（亞運版）

9. 初級電競探索訓練（經典版）

10. 電競進階課程&基本電競評述體驗課程

11. 基礎運動心理學課程

12. FIFA基礎電競課程

*學員完成相關的電競課程後，亦將獲得受認可的電競課程證書。