喺上星期嘅Apple發布會中，除咗開頭有一堆回顧數字之外，就只係發布咗3部新iPhone同埋一隻新Apple Watch，而其他大家期待嘅產品iPad Pro、AirPods都無出現過。而上年發布嘅無線充電板AirPower，今次喺發布會度更消失得無影無蹤，究竟AirPower係咪被徹底放棄呢？

日前有外媒爆料指，無線充電板AirPower一直遲遲未有消息係因為產品遇上「過熱」問題，當AirPower進行無線充電時會導致過熱，影響到充電速度以及充電嘅準確性，所以目前AirPower嘅表現係絕對唔合格。按目前AirPower情況估計，今年都未必可以推出，甚至要有被Apple放棄嘅可能。

其實AirPower係採用咗多線圈設計，由於發熱量太大，喺充電過程中會越嚟越熱，部分工程師認為呢種設計方式唔可行。目前Apple新推出嘅iPhone手機全部都支援無線充電技術，但無線充電器一直都係依賴第三方廠商，所以Apple有必要好好重新檢討並推出合格嘅無線充電板。

不過Apple過去都有唔少「胎死腹中」嘅產品出現過，包括喺2008年9月Apple就申請過一項VR頭戴設備專利，亦即係類似HTC Vive及Samsung所推出嘅VR眼鏡；亦有喺2010年申請專利嘅智能單車，呢部單車配備了多個傳感器，可以與iPhone或iPod連接，並實時顯示速度、距離、海拔及心率等運動數據。

來源：The Verge