【宇宙警察】特朗普要求組建太空部隊

文：MenClub 路易斯　　圖：互聯網
POSTED ON 19 Jun 2018

美國唔只要做世界警察，仲要做埋宇宙警察！美國總統特朗普下令五角大樓成立一隊「太空部隊」(Space Force)，並成為美軍嘅第六軍種。佢又指出，美國將永遠保持太空領域嘅領先地位，而且唔想俾中俄等國家超前美國一直主導嘅地位。

早喺今年嘅3月13日，特朗普已經提出成立「太空部隊」作為國家安全策略嘅想法，佢認為太空同海陸空一樣，都係作戰領域。而新嘅「太空部隊」將會與其餘5大美軍軍種地位相同，當中包括海軍、陸軍、空軍、海軍陸戰隊及海岸警衛隊。

特朗普上場之後嘅美國就好似超人一樣，解決北韓問題，向中國大打貿易戰，而家連太空都保護埋，真係要唱返超人首主題曲「護衛人類挽救地球看守這宇宙」！

特朗普仲認為，美國喺地球以外嘅使命唔單只係國家認同問題，亦都係國家安全問題，對美國軍隊及人民都非常重要。而講到捍衛美國，佢指出僅僅擁有「太空部隊」係唔夠，仲要喺太空擁有領先地位。另外，特朗普仲希望通過令美國重返月球，加快抵達火星等舉措，去恢復美國空前嘅太空計劃。