仲記唔記得自己幾耐無玩過Winning Eleven(PES/實況足球)？曾幾何時講起足球Game一定會提起Winning，自從Winning入面嘅球隊以至各國聯賽版權逐漸失去，實況足球都變到完全唔真實，更令FIFA有機可乘取代Winning成為足球Game一哥。但係咸魚翻生都唔係完全無機會，今年8 月喺印尼雅加達巨港舉行嘅 2018年亞運，Winning入選成為其中款電競示範項目，若然喺亞運中取得成功，絕對有機會喺2022年亞運成為電競比賽項目之一。

其實近年Winning都非常積極，就連香港政府認為係方言嘅廣東話Winning都非常重視，上集《PES 2017》更搵嚟Keyman 馬啟仁及伍家謙以廣東話旁述遊戲，試問仲有幾多遊戲會有廣東話？8月登場嘅《PES2019》雖然失去歐聯、歐霸版權，但仍加入不少經典元素，包括myClub會出現Beckham、Maradona、Cruyff、Nedvěd、Gullit、Maldini以及Kahn等傳奇球員，相信Winning好好把握亞運嘅舞台，仍然會有翻生機會。

6個亞運電競示範項目中，分為團體項目及個人單項，其中團體項目包括《英雄聯盟》、《PES 2018》及《傳說對決》；個人單項包括《星海爭霸II》、《爐石戰記》及《部落衝突︰皇室戰爭》。

值得一提嘅係，6個示範項目中騰訊包辦咗3 個遊戲，分別係《英雄聯盟》、《傳說對決》及《部落衝突︰皇室戰爭》。唔知騰訊旗下嘅「食雞」遊戲《絕地求生》，有無機會成為2022年亞運項目之一呢？不論係觀戰定參戰，相信一班每日約埋三五知己嘅「食雞」fans都十分有興趣！