沙田戲迷係咪等咗好耐呢？暑假即將開業嘅沙田戲院大樓正式命名為「MOVIE TOWN」，呢間戲院大樓引入咗全港首個4K超高清影院LED螢幕，亦係全港首間全制式RealD Cinema。除此之外，大樓內亦設有7間影院並提供超過1,700個座位，係新界最大規模嘅戲院。

4K LED影院啫係點？「MOVIE TOWN」採用嘅係Samsung Onyx Cinema LED螢幕，即係唔需要用投影機投射影像上大銀幕，螢幕畫質高達4K超高清解像度(4,096 x 2,160)，而無縫安裝嘅螢幕配備高精度畫面校準功能。此外，LED螢幕亦有HDR功能，喺最亮或最暗嘅場景入面都可以輸出全彩色亮度及對比度，並顯著降低能源消耗。

咁乜嘢係全制式RealD Cinema？佢採用咗4K鐳射投影機，可達到比全高清1080p 4倍嘅清晰度，相比一般巨幕影院使用嘅2K 雙機（dual projector）配置，提供高出一倍嘅影像解像度。