Photos: xmnn

綜合中國內地網站及著名美國資訊科技網站Verge.com報道，深圳羅湖海關喺上月30日，截獲一名可疑香港女子，喺佢身上搜出102部iPhone同15隻腕錶。 

據知，當時關員見到該名女子，大熱天時仲著外套，塊面又紅卜卜，再望埋佢嘅身型，手幼腳幼，偏偏上半身就肥嘟嘟，極之唔合比例。

經金屬探測器檢查發現，該名港女腰、胸各以膠帶纏咗一圈手機，每圈各有四層，合計102部蘋果iPhone，另喺機與機之間嘅夾縫位藏咗15隻天梭（Tissot）腕錶。 

據羅湖海關表示，過往都有走私客以類似方法偷運手機，但數量最多介乎70至80部，今次數量過百，可謂「破紀錄」。

每逢有新iPhone推出，都聽到有人聲稱「偷偷哋」拎幾部「上去」，賺返啲洗用幫補吓。但係，上得山多終遇虎，衰一舖乜都嘔凸。