Photos: Mark Stone/University of Washington

「呢嚿無殼嘅深綠色一片嘢，你同我講佢係電話？不如你同我講，拎住呢嚿嘢對住提款機，部機會自動噴銀紙出嚟！！」 

美國華盛頓大學（University of Washington）研究團隊，最近發表「無電池手機」，所謂無電池，係指部機冇傳統手機嘅電池，唔使成日拮住「尿袋」或駁住USB線攞電咁煩。

開發團隊

「無電池手機」從用家身邊嘅無線電訊號同燈光，轉化成電能，儲存喺手機上嘅微型太陽能電池（約一粒米嘅大小）。呢部「無電池手機」僅需要3.5微瓦電力，而且支援Skype call，方便用家聯絡固網電話用戶。

「無電池手機」仍處於研究開發階段，有唔少局限。

例如電池電量有限，用家所處位置唔可以離手機網絡基站太遠，目前測試嘅距離，約為50尺，即約15米。

另外，通話時需按住通話掣，有啲似用Walkie-talkie，唔夠方便喎。

仲有，連團隊自己都話，今日嘅手提電話，有幾何真係用嚟打電話吖。

不過，團隊呢項原型設計，的確提供到一啲頭緒同方向，唔用電池嘅手機可以點樣設計。

希望出到iPhone 20嗰陣，唔使用電池就好。