Photos: University of the West of England/Wikipedia

尿液發電唔係新嘢，早喺2015年，英國布里斯托西英格蘭大學（University of the West of England）研究團隊已發明以尿液，配合液料電池產生電力。 

呢項咁過癮嘅新技術，能夠喺偏遠或基礎建設配套不足嘅落後地區，提供有限度電力，供電燈照明，以至手機充電都得。城巿人嘅廁所都光光猛猛，但喺落後地區或難民營，冇燈嘅廁所（尤其女廁）就經常發生罪案。喺外國嘅大型戶外活動，「自給自足」嘅照明系統，大大減省倚賴以燃料（柴油）驅動流動發電機，咁廢氣就自然少得多啦。

格拉斯頓伯里節（Glastonbury Festival）

上月底一連五日，喺英國舉行嘅全球最大型音樂會——格拉斯頓伯里節（Glastonbury Festival），會場內所有廁所都配備尿液發電系統，大會仲同大學方面簽訂5年合作協議。

尿液發電嘅原理，係借助微生物燃料電池（Microbial Fuel Cells，簡稱MFC）內嘅微生物，汲取尿液並分解，過程中產生電子（Electron），轉化成電力。研究團隊現正加以著手縮小燃料電池體積同增強電力輸出。

近年格拉斯頓伯里節舉行期間，賣出門票達135,000張，每一屆都要使用接近4000個臨時洗手間，唔難想像到會有幾多「篤」尿。

講完，唔阻你飲埋杯早餐咖啡。