日本富士山由今年7月1日起「開山」，今年「開山期」於9月10日結束。 

日本各家流動通訊網絡供應商，預計「開山期」內日本國內及海外遊客眾多，特別改強富士山4條登山道，及山頂區域嘅4G流動網絡及免費Wi Fi服務。 

4條登山道分別為吉田、須走、御殿場及富士宮。

其中KDDI會喺7月4日至8月下旬，喺富士山頂增設4G LTE服務，而上述各登山道口及登山道全線，均有4G LTE服務。換言之，開山期間，KDDI嘅用戶可以喺整個富士山地區（遊人進入部份），使用高速上網服務。 

另外，KDDI屬下，主攻旅日遊客巿場嘅Wi2 Wire & Wireless，已於7月1起至今年9月上旬，提供名為「富士山Wi Fi」嘅免費Wi Fi服務，遊客可以喺富士山區域內49間山小屋同靜岡機場使用「富士山Wi Fi」。

NTT Docomo方面，7月10日至8月下旬，富士山頂將有「PREMIUM 4G」服務，客戶喺山頂嘅通信速度可高達682Mbps，而登山口及登山道嘅通信速度亦可達337.5Mbps至450Mbps。該公司用戶亦可喺各山小屋使用NTT Docomo嘅免費Wi Fi服務。 

講真吖，我都知你秒秒鐘幾百萬上落，上網對你嚟講係好緊要，但係一場嚟到，用對眼慢慢睇真，用個心去feel吓都好緊要，擺相上FB，返到落山都唔算太遲吖。