Photos: Wikipedia

據英國每日電訊報報道，日前展開為期6星期試航嘅英國新航空母艦「伊利沙伯女王號」（HMS Queen Elizabeth），被傳媒發現其控制室，有電腦屏幕顯示Windows XP畫面。 

外界擔心造價約300億港元嘅「伊利沙伯女王號」，使用微軟（Microsoft）已不再支援嘅過時Windows作業系統，無法抵禦網上攻擊或黑客入侵。

英國國防大臣房應麟（Michael Fallon）向傳媒表示，話「伊利沙伯女王號」係安全嘅，因為船上嘅電腦系統得到妥善保護。哦！典型嘅官方答案啦。

英國國防大臣房應麟（Michael Fallon）

英國索立大學（University of Surrey）電腦專家Alan Woodward認為，如果「伊利沙伯女王號」以XP作為航母嘅運作系統，咁會「係極之危險」，佢質疑軍方「點解喺一艘會使用幾十年嘅新船，使用已經過時嘅電腦作業系統」。 

有熟悉國防部嘅人士向英國傳媒表示，「伊利沙伯女王號」喺2004年設計嗰陣，XP系統係「OK嘅，係可靠嘅，不過而家係『古董』㗎喇」！

今次試航會途經北海，預料俄羅斯會有潛艇、間諜船監視，畀在我係俄羅斯國防部揸fit人，梗係試吓佢套XP係唔係咁堅啦。