其實上次Mavic Pro已經有唔少人心動想落坑，但結果都係嫌貴，而今次定位入門嘅Spark，主打自拍功能加上支援手勢操作，DJI發布會上Michael Perry更即場示範用手勢遙控自拍，見佢對住Spark，鏡頭郁下隻手就可以控制上下左右同前後飛行真係幾得意。講返拍攝功能，Spark有1200萬像素鏡頭，可以拍1080p影片，支援ActiveTrack智能跟隨同TapFly指點飛行之餘，仲有新嘅一鍵拍片，撳一個掣就可以令Spark鏡頭對住你然後慢慢飛走，最適合用嚟拍風景。其實近來喺facebook經常見朋友都會帶埋航拍機去旅行拍片，事關新出嘅航拍機愈來愈易用，而且有咁多自動模式同輔助功能，令新手都可以玩到基本嘢，所以今次Spark真係啱晒入門用家。

至於機身方面，Spark長度170mm兼只得300g重，真係又輕又細，不過由於體積同電池都縮細咗，所以續航力亦減至16分鐘，但已經係同類機款最持久。除咗自拍之外，今次Spark仲有Sport模式等你玩競速，最高時速達到50公里，而且支援DJI飛行眼鏡玩第一身視點，大大提升速度感！Spark售價$3,899起，依家去官網已經有得訂(http://store.dji.com/zh-tw/product/spark?site=brandsite&from=buy_now_bar)，6月15日開始出貨。