{ SKIP }
文:MenClub Mean娜  圖:MenClub
POSTED ON 11 Apr 2017
香港地彷彿只有大人物大事件先值得被人注意,邊個邊個明星鬧緋聞、邊個邊個官員講錯嘢,who fucking care 佢哋身邊嘅巴士司機清潔工人呢啲小人物嘅小故事。但唔好忘記,香港呢個彈丸之地,就係由大部分小人物同小部分大人物所組成,所謂小人物嘅故事,好可能就係你你我我嘅故事。



當初《一念無明》嘅構思,就係由新聞報導上一篇小故事而生︰「有次編劇睇到篇新聞,講個中年男人長期照顧一個有病患嘅爸爸,你可以想像到咁嘅關係其實係好折磨雙方。有日中年男人照顧爸爸時有啲拉扯,結果爸爸死咗,個仔被判誤殺。但個新聞就咁一件事件就完咗,冇人知道或者冇人關心個仔同爸爸點解會走到呢步,亦冇人理往後個中年男人仲要面對咩情況。於是編劇覺得好糾結,認為我哋關心一個人唔係限於一件事,而係要同對方一齊經歷,你先會知道呢個人真正嘅故事係點。或者可以講,比如呢件悲劇,我哋應該要從中睇到乜嘢、學到乜嘢呢?就係因為呢種糾結,編劇開始創作去回應呢個事件。」後來黃進同編劇一齊進行許多訪談、資料搜集,甚至相約醫生、社工、精神病患者傾偈,了解香港社會好多真實故事,而《一念無明》電影中好多對白,都係真實出現於別人嘅故事當中︰「拍《一念無明》嘅中間我一直好強烈覺得呢個唔係Drama咁簡單,而係背負住好多人真實嘅生活同故事。」



就好似《一念無明》其中一場戲,阿東(余文樂飾)同黃大海(曾志偉飾)喺天台鬧交,黃大海話︰「好多事都係因為我先搞成咁,但我真係唔識,我真係唔識做人老竇,冇人教過我做一個爸爸應該要點做。」呢一句對白,除咗觸動黃進之外,仲觸動到好多男觀眾︰「好多人差唔多年紀就被安放去某個位置︰要成家立室、做好爸爸、做好丈夫,但其實冇人教過佢應該要點做,每個人都好似強行被拉上馬,忽然間就要做爸爸,為孩子去負責。」黃大海句「我真係唔識」可能係好多男士嘅心聲︰都冇人教過我要點撐起頭家或者做人爸爸,但就好似冇得迴避,一定要做。








正正因為大家都唔識,所以唔只父子關係,好多關係裡面我哋都會「以為」係為對方好,但其實不知不覺間傷害咗對方。《一念無明》其中一幕,阿東迫佢有關節痛嘅媽媽呂婉蓉(金燕玲飾)做伸展運動,其實係為佢好,但男人就係覺得既然我係為你好,咁用咩方法都要做到。於是阿東就用咗啲傷害到對方嘅方法,都不惜要完成件事︰「其實咁做係好傷害雙方,但又係現實中經常出現嘅情況。」戲中阿東要入廁所幫媽媽清潔,呂婉蓉本來係一個好強勢嘅女人,但去到嗰一刻,都要接受自己嘅軟弱,同阿東講︰「唔好意思,麻煩晒你。」因為佢清楚明白,冇咗眼前呢個經常被佢拎嚟發洩嘅兒子,佢將來都唔知應該點生活落去。即使佢哋成日傷害對方,但同時佢哋都好需要對方。「《一念無明》入面好重要嘅主題就係︰人好多時必須要接受自己一個人係唔能夠撐落去,如果我哋能夠緊靠住,一齊行落去,我哋可以行得更加遠。」


點先叫「真正對對方好」其實係好高深嘅學問︰「愛可能大家都有,愛唔難,但點去愛係好難。」原來真正嘅愛,並唔係高舉住個愛字就大晒,喺你口口聲聲話愛對方嘅同時,有冇真正了解過對方呢?假如你唔了解對方,就算你點愛對方都好,你嘅「愛」對對方而言,可能都變咗形,變成一種傷害,你永遠唔知道,你所做嘅事,其實係咪只為咗滿足自己。好多時我哋講嘅「愛」都係單向,我「愛」你,我「為你好」,你應該要明白我嘅用心等等,到頭來一切只係為咗滿足自己,對方真正想要啲咩,你又知唔知呢?





喺香港,我哋好難同對方真正交流真正相處,更多時候,我哋係同對方嘅「標籤」相處︰你做呢行大約係咁嘅人啦、咁嘅收入啦、咁嘅學識啦……但大家嘅底蘊同你認知嘅可能不同。好似黃大海作為爸爸,雖然好想全心全意去愛有精神病嘅兒子,但另一方面會被精神病嘅「標籤」所左右,收埋武器防備兒子,呢種矛盾,相信你我都有試過。「其實好多恐懼都係來自唔了解,就好似精神病、情緒病等等被邊緣化嘅人,因為係小眾,因為同自己唔同,所以會好驚好排擠。人係好怕被挑戰到自己本位,就好似地鐵縱火案,開頭啲人會疑惑點解會發生呢種事,直至發現縱火者有精神病,就『如獲至寶』搵到答案︰因為佢有問題,因為佢唔正常,所以先有縱火案,只要將佢排除在外,就冇問題。但其實有精神科醫生話,縱火同精神病嘅關係極細,甚至係冇見過。而數據上嚟講,情緒病或精神病患者會傷害人嘅機會率係好低好低,至少低過正常人。你日日見到啲打打殺殺,全部都係正常人,但就係因為有『標籤』,於是將所有恐懼加諸喺佢身上。」但係人與人之間嘅相處並唔應該咁。

戲中阿東嘅鄰居本來覺得阿東都幾好,但一知道阿東有精神病,就即刻要仔仔同自己一齊疏遠佢;但仔仔並冇咁做,依然好鍾意同阿東玩,因為佢認知中冇「標籤」呢樣嘢,只係好純粹憑自己感覺︰呢個人對我好,而同對方交往。




其實人係好立體,唔係只得一面,每個人都會有過開心、傷心、憤怒等等情緒;每個人都會有同自己相似嘅感覺,唔好單單用一個「標籤」去同人交往咁懶惰,當你了解對方,明白對方嘅故事,深入對方情感,你會知道,每個小人物嘅小故事,其實都有自己嘅影子。


不論你對ViuTV持有甚麼態度,你都不能否認它近年為香港娛樂圈捧出一群至少有話題性的年輕面孔。單論《全民造星》系列就為大家「貢獻」出Mirror、Error、P1X3L、Collar四隊組合,再加MC張天賦、Mansonvibes 張進翹、A ...
people
【MenClub People】鍾意,己經夠啦 - Johnny Hui 強尼
30 Sep 2022
第一次親眼「見到」洪嘉豪,是去年年尾在Jace (陳凱詠) 的演唱會上。雖然當晚他只是作為觀眾於台下睇Show,但每到Jace準備邀請嘉賓上台時,我旁邊就會有個不知名男觀眾,不停用洪嘉豪欠他錢沒還似的語氣大叫「洪嘉豪 ...
people
【MenClub People】一步一腳印 - Kaho Hung 洪嘉豪
04 Jul 2022