{ SKIP }
文:MenClub 波特先生  圖:MenClub
POSTED ON 20 Dec 2017

跳繩相信唔少人都有玩過,以前細個係公園拎住條繩自己跳,又或者一班人一齊跳大繩,都係一啲開心嘅回憶。黎到今時今日,繩唔再係普通咁原地跳,而係可以跳出各種花款,甚至成為一種近年越黎越多人參與嘅運動 - 花式跳繩。

 
花式跳繩近年已經成為香港非常多人關注嘅運動,無他嘅,因為我地香港出左一隊花繩嘅世界冠軍,更多學校願意放資源去搞呢項運動,而花繩亦成為唔少活動入面嘅指定表演項目之一,就係咁認識花繩嘅人多少,欣賞佢地嘅人亦都逐漸增加。
 
而今次我地MenClub成功請黎香港花繩團隊世界冠軍嘅三位成員:何柱霆、周永樂、劉浩男,同埋佢地嘅教練Ken Sir黎左一次專訪。
 
三位花繩世界冠軍成員都表示,佢地細細個就開始接觸花繩,並且都係由Ken Sir將佢地發掘出黎。而Ken Sir當年就係想做啲與別不同嘅野,所以就將每間學校最出色嘅花繩學生挑選出黎,組成一隊最強嘅隊伍。起初Ken Sir都無諗過要拎咩世界冠軍,但點知佢呢班學生越練越勁,最終無論團體定係個人都有成員登上世界冠軍。
 
不過Ken Sir透露,其實佢教繩多年都遇過唔少困難,其中學生家長對學業及活動嘅取捨,往往令部份有潛質嘅選手被迫放棄花繩,實在令人不勝唏噓。以上呢個情況,其實喺香港嘅運動界都屢見不鮮,始終香港唔少家長都認為運動只係課外活動,讀書先係最重要,令有機會為港爭光嘅選手被活生生的埋葬了。
 
能夠奪得團體冠軍,隊友們嘅合作絕對係唔少得,不過同時因為佢地都會參加個人項目,但冠軍就只有一個,佢地又會唔會因此而妒忌身邊嘅隊友呢?獲得個人全能總冠軍嘅何柱霆表示,喺佢自己心目中其實自己並唔係冠軍,因為佢覺得自己係每個項目入面都未達到頂峰,只係比賽期間發揮比較平均,好似個人花式佢就自認及唔上隊友周永樂,所以隊內無話有負面嘅比較,只係有令佢地更進一步嘅比較。如果真係有負面嘅妒忌,佢相信呢一隊人已經拆左夥了。
外人睇佢地可能有成員係某項個人冠軍,有成員就只係團體冠軍,但係佢地就覺得佢地每個成員叻嘅地方都唔同,有部份成員就係喺個人項目較強,有部份則係多人配合下嘅合作項目更強,而即使係揀音樂、諗動作其實都缺一不可,佢地已經成為一個整體,邊個拎冠軍對於佢地黎講都係一樣開心。
 
花繩係佢地心目中已經成為最重要嘅一樣野,但係有一樣野可能比花繩更重要,就係佢地之間嘅兄弟情,又或者咁講佢地係有花繩先有呢種兄弟情,而有呢班兄弟佢地就更加唔可能同花繩分割開,環環相扣下先造就到佢地今時今日呢支最強隊伍,希望未來佢地可以更進一步,為香港拎更多國際獎項,揚威海外!
做女教練其實真係一啲都唔容易!
people
【不甘示弱】女田徑教練 - Lily Lee
12 Apr 2018
受傷都無阻對賴楨敏馬術嘅熱愛!
people
重生女騎師 - 賴楨敏
30 Mar 2018