人在江湖雜務繁忙，就算買咗部PS4返屋企幾年，都冇乜幾可坐定定搵隻Game黎煲下。而印象中過去幾年唯一令到我有「恆心」係咁煲嘅，就只有受「朋輩影響」嘅《Monster Hunter World》，以及由 CD Projekt Red製作嘅《Witcher 3》。後者嘅磅礡故事、廣大世界觀、行到傻嘅開放式地圖、超多武器防具選擇(及支線任務)真係令人諗起《庖丁解牛》嘅「以有涯隨無涯，殆矣」。而CD Projekt Red於昨日舉行嘅E3中就驚喜地宣佈公佈新作《Cyberpunk 2077》嘅預告。
《Cyberpunk 2077》呢個名好明確地話咗你知個故事喺發生喺幾十年後嘅空想未來，科技已經發展到可以為人體植入各種機械部件。主角「V」係一名傭兵，而佢所在嘅城市「Night City」係一個貧富懸殊嚴重，超大企業壟斷一切，社會低層充滿黑幫、生活環境惡劣嘅大都會，而玩家嘅目的就係要成為一代傳奇。Youtube上嘅描述更指明《Cyperpunk 2077》係一個「著重故事的開放式世界單人遊戲」，以CD Projekt Red嘅往績，真係令人相當期待。
而CD Projekt Red唔單止做Game好，仲好鬼有良心。事關有人發現佢哋喺預告中隱藏咗一封公開信，入面隨咗講到明「質素好重要，所以大家仲要等(好一會兒)」之外，仲承諾會有免費DLC，以及一如《Witcher 3》一樣冇數位版權(DRM)。至於近年「流行」嘅「課金」，佢哋就用一句「單人遊戲課金？傻的嗎？」黎回答，瀟灑。
簡單啲黎講，CD Projekt Red就為大家描繪咗一隻非常吸引嘅近未來科幻RPG遊戲，不過要玩呢，就唔知等到幾時啦。
