【含住金鎖匙】點解我老豆唔係「籃球之神」Michael Jordan?

文：MenClub 波特先生　　圖：互聯網
POSTED ON 07 Mar 2018


Michael Jordan呢個名，唔好話你係籃球迷，就算係普通人基本上都一定聽過，人稱「籃球之神」、NBA歷史最出色嘅球員，曾經奪得過6次NBA總冠軍，並6次成為總決賽MVP，佢絕對可以話係等同於籃球的存在。

史無前例嘅表現，加上無數榮譽加身，Jordan係NBA歷史上最頂端嘅人物，而憑住統治性嘅力量，佢化身成為籃球嘅代言人，因此令人嘩然嘅合同及無數嘅代言，令佢收入遠超一眾NBA球員，再加上同Nike合作推出嘅Jordan Brand空前成功，令Jordan收入盆滿砵滿，其後佢更收購左NBA球隊夏洛特山貓，並將佢地再次打造成如今嘅黃蜂，所以最有錢嘅NBA球員絕對非Jordan莫屬。

而如果你作為Jordan嘅孩子，唔知又會有一個點樣嘅生活呢?

目前黎講，Jordan值資產達到16.5億美元，亦即係超過120億港元，雖然對比岩岩成為全球首富amazon老闆所擁有超過1200億美元嘅身家，Jordan真係不值一看，但係對比我地呢啲普通人16.5億美元已經係天價嘅數字。

2014年，Jordan誕下自己第4及第5個孩子，他們是一對龍鳳胎。

另外，Jordan的兒子Marcus Jordan，現年27歲，2009-2012年期間為UCF大學參加NCAA比賽，可能你會認為佢擁有Jordan嘅血統，但實際上佢只係一名中庸球員，大學期間場均只係拎到12.3分，最終無緣加入NBA舞台。

雖然喺籃球領域達唔到父親嘅高度，Marcus畢業後卻做起同Jordan一樣嘅野，就係做老闆啦，佢喺迪士尼入面開設一間精品波鞋店，叫作Trophy Room，而開店嘅日期為5月23日，選擇23日開店係因為向其父親偉大嘅23號球衣致敬。

而作為Jordan嘅大兒子，Jeffrey Michael Jordan現年29歲，同樣無好好繼承父親嘅籃球實力，佢喺大學打左5年波，最終都係無法加入NBA。不過離開校園嘅佢始終都同父親有住唔少關係，因為佢喺2013年加入Nike成為旗下嘅員工之一，唔知佢係咪負責幫手管理父親嘅Jordan Brand呢?

Jordan嘅大女兒Jasmine Jordan，現年24歲，目前則係其父親Jordan Brand喺夏洛特及北卡嘅代表。