NBA新球季聽日就正式開打啦，相信各位球迷已經好心急，好想快啲睇到自己嘅愛隊或鍾意嘅球星會有點樣嘅表現，而究竟呢個新球季有咩值得留意呢？

1、76人

一直被認為係東岸魚腩嘅76人，期待已久嘅中鋒Joel Embiid上季終於正式復出，而佢雖然只係上陣31場，但係其表現卻令76人嘅球迷感到前途一片光明。再加上新球季，76人將會加入2016年狀元Ben Simmons、2017年狀元Markelle Fultz及著名射手J.J. Redick，實力將大幅增加，他們勢必會喺東岸成為黑馬，挑戰騎士及塞爾特人嘅霸權。

2、球星大執位

今年夏天NBA多位球星都選擇轉隊，其中包括Chris Paul加盟火箭；Gordan Hayward及Kyrie Irving加盟塞爾特人；Isaiah Thomas、Derrick Rose及Dwyane Wade加盟騎士；Carmelo Anthony及Paul George加盟雷霆；Jimmy Butler及Jeff Teague加盟木狼。

以上嘅球隊喺球星加盟後，牌面實力都獲得大幅提升，但係佢地能唔能夠產生化學作用則係最令人關注嘅地方。

3、勇士繼續無敵？

勇士今夏成功保留住核心陣容，並加入其他綠葉球員，好似Nick Young、Omri Casspi，球隊實力可以話進一步提升。不過好似上面提到，有多支球隊實力都大幅提升，特別係西岸，其中雷霆同火箭將成為有力嘅挑戰者，而木狼亦都係黑馬之一，仲有長年都唔可以睇少嘅馬刺，喺常規賽勇士應該可以繼續稱霸西岸，但喺季後賽相信佢地將會遇上前所未見嘅麻煩。

4、話題球員Lonzo Ball

今年夏天湖人喺選秀大會上同外界預期一樣，以榜眼簽簽入話題球員Lonzo Ball。呢位新秀控衛喺加入NBA前已經係話題人物，原因係其父親LaVar Ball多次公開發表令人咋舌嘅言論，包括話其兒子Lonzo Ball比Curry、Westbrook等超級巨星實力更強，因此已經為其兒子得罪左唔少人，而外界都好想睇到一眾超巨點樣教訓呢位新人。

另一方面，傳統勁旅湖人已經對Ball寄予厚望，認為佢將會成為球隊嘅未來核心，因此佢嘅表現將會受到萬二分嘅關注。

5、輪休問題

上季多支球隊都出現選擇性輪休，令NBA官方備受壓力，因此今夏NBA主席Adam Silver全力解決呢個問題。最終，NBA官方決定將開季時間提前一個星期，從而減少部份魔鬼賽程，例如背靠背比賽嘅次數。另外，新規定亦禁止健康嘅球員隨意輪休，特別喺全美直播或強強對碰更加唔建議輪休，如果球隊真係希望球員可以輪休，應休先選擇在球隊主場比賽中發生，否則Silver將可以對球隊進行罰款。

新規則將嚴重影響一向鍾意輪休嘅球隊，其中馬刺相信係最受影響嘅球隊，佢地嘅主教練Gregg Popovich可以話將輪休達到爐火純青嘅地步，無論咩比賽、面對咩對手佢都會輪休，唔知面對官方呢條新規則，佢又會有咩方法去避過罰款呢？

6、全明星賽新賽制

近年嘅NBA全明星賽，因為球員們為左保護自己，並唔會全力出戰，再加上東西岸實力越拉越遠，令賽事變得越黎越無聊。有見及此，NBA官方重新制定新嘅全明星賽規則，東西岸對決將成為歷史，取而代之嘅係東西岸得票最高嘅球員將可以自由選擇入選全明星陣容入面嘅球員，這代表同一支球隊嘅球員都可能會成為敵人，而東西岸嘅球員亦會聯手，相信呢個新鮮感賽制會為明星賽帶黎正面影響。