【神之能力】NBA可以令隊員變強的五人

文：MenClub Mr.波特　　圖：互聯網
POSTED ON 28 Jul 2017


近日NBA轉得最熱嘅事，相信就係騎士控衛Kyrie Irving有意離隊，希望離開LeBron James嘅陰影，自立門戶成為另一支球隊嘅領軍人物。不過，對於Irving呢個諗法唔少人都唔睇好，佢地認為Irving嘅領軍能力不足，目前只適合留喺騎士做二哥，無左LeBron喺佢身邊，佢嘅表現一定唔可以帶隊取得好多嘅勝利。

其實睇番喺LeBron重返騎士之前，騎士一直都係由Irving獨自領軍的，但係佢作為領頭人個人表現係唔錯嘅，但係球隊戰績就明顯唔得，連一次打入季後賽都未試過，所以對於佢嘅領軍能力球迷先咁唔睇好。

得而且確，如今嘅Irving被認為喺聯盟前五嘅控衛，但係呢個只可以建基於佢身邊有LeBron James喺度，因為LeBron擁有令佢身邊嘅隊友變強嘅能力，而Irving就係受益於呢個情況，因為Irving嘅弱點可以作為騎士嘅額外能力，講緊嘅就係佢嘅單打能力。過度嘅單打對於一支球隊黎講唔係好事，但係對於騎士黎講Irving嘅單打就係當球隊喺LeBron嘅帶領下未能取得優勢時嘅手段，佢可以憑住單打攻擊去全力追分，甚至反超對手。

不過，當把Irving當作球隊核心黎用，佢嘅單打打法就會成為場上嘅黑洞，佢嘅隊友就會減少觸球，防守嘅球員亦很容易估到你只會單打，繼而對你進行夾擊。所以，Irving嘅能力只限個人，對帶領一支球隊並無任何好處，因此當佢作為球隊老大，咁嘅領軍方式好難取得成功。

而NBA歷史上，能夠令隊友變強嘅球員並唔多，而以下5位相信係目前呢一方面最強大嘅球員：

1、LeBron James － LeBron係一名以助攻為先嘅球員，而由於佢嘅進攻亦都一樣強大，所以防守者基本難以從佢身上離開，因此作為佢嘅隊友就可以擁有比平時更多嘅空位，再加上佢嘅籃球智商，佢嘅球隊往往都係NBA最強之一。

2、Magic Johnson －喺LeBron James出現前，Magic可以話喺最會令隊友變強嘅球員，佢嘅全能表現，特別係助攻令佢嘅隊友喺比賽入面變得更加輕鬆，繼而將更多力量發喺其他地方，所以Magic嘅湖人先會咁強大。

3、Michael Jordan － Jordan嘅個人能力絕對係大到難以想像，正因為咁所以可能會遮蓋左佢嘅帶隊能力。要知道當時公牛陣中擁有全NBA都認為難以控制嘅Dennis Rodman，但由於Jordan強大嘅氣場，即使係Rodman亦對佢聽聽話話，並且將佢嘅能力發揮到極致。

4、Lonzo Ball －雖然呢位話題球員一場NBA比賽都未打，但係單睇岩岩今年嘅夏季聯賽，Ball確實擁有好強嘅帶隊能力，佢可以令到順位較低嘅隊友打出20-30分嘅表現，最終更勇奪冠軍，真係好期待佢黎緊一季嘅表現。

5、Gregg Popovich(馬刺體系) － Popovich被認為係「軍神」，但係佢除左戰術出色之外，點石成金嘅能力亦都出晒名，本黎只係落選新秀，又或只係低順位新秀，但最終喺佢嘅使用下，呢啲最終有機會成為一位傳奇又或重要嘅角色球員，就好似Tony Parker同Manu Ginobili咁。而馬刺嘅體系亦都係主張全民皆兵，所以每一位球員都可以有機會發揮自己所長，表現往往亦都會較預期出色。