{ SKIP }
文:MenClub Mr.波特  圖:互聯網
POSTED ON 14 Jul 2017


今年夏天,湖人連續第三年獲得選秀榜眼,繼D’Angelo Russell及Brandon Ingram後,湖人今次揀嘅係話題性新秀Lonzo Ball,呢位被認為模板係「神奇小子」Jason Kidd嘅新人,佢嘅父親係口沒遮攔嘅LaVar Ball。雖然有一位「非常父親」,但係湖人認定佢嘅天賦,所以一於少理,甚至提前交易掉球隊本來嘅正選控衛Russell,為嘅就係準備一個正選位置比Ball。




Ball嘅能力大家相信已經聽過唔少,亦都睇過佢以往比賽嘅影片,但係黎到NBA卻又係另一回事,所以要想提前觀察佢,夏季聯賽就係一個絕住嘅地方。因為一班NBA新人同部份NBA邊緣球員將會聚集比賽,比賽嘅程度理應係最接近NBA的,所以如果Ball如果能夠交出好表現,咁佢喺黎緊NBA嘅比賽就會令人更有信心。


作為今年新秀榜眼又係話題性人物,Ball嘅夏季聯賽比賽都吸引唔少關注,其中LeBron James亦曾親自黎到現場睇佢打波。而雖然背負住湖人極高嘅期望,以及Hater們嘅攻擊,但係Ball對於呢啲壓力好似都親而不見咁,喺比賽入面發揮得心應手,將自己最強嘅地方施展出黎。



今日湖人面對騎士嘅比賽,Ball再次交出全能表現,成功第2次交出大三元:16分12助攻10籃板,外加5抄截2封阻,全能表現再次展現,最終湖人亦成功擊敗騎士,殺入賽事8強。


連帶今日嘅比賽,Ball目前參加左4場比賽,場均上陣34.5分鐘,可以拎到17分9.8助攻8.3籃板3.3抄截1.5封阻,其中場均助攻暫時排名第一,而呢一點其實亦接近預期,因為Ball最強嘅一點就係傳球,有睇佢比賽嘅球迷應該都有見到佢經常喺後場好似美式足球嘅四分衛咁傳球,球好精準咁越過對方球員傳至跑至最前嘅隊友手上,作為如今講求速度嘅NBA比賽下,Ball呢種傳送絕對係非常有價值的。


而得分方面,Ball場均17分明顯唔屬於頂級水平,再睇下佢嘅投射命中率,4場比賽平均只有35.7%,呢個數字明顯係唔合格的。喺比賽入面,其實都可以睇到Ball嘅投射,無論係2分定3分都無預期咁準,佢能夠場均拎到17分靠嘅係佢經常剷籃得手,兼且成日博到犯規有罰球射。所以,Ball黎緊最重要嘅一定係改善自己嘅投射能力,要改變佢奇怪嘅射姿應該唔係件事,所以要令佢點樣發揮呢種奇怪射姿至極限,就係教練Luke Walton要做嘅事。



其實射姿奇怪喺NBA不時會出現,好似已退役嘅明星前鋒Shawn Marion便係擁有奇怪射姿嘅表表者,但係佢生涯場均投射命中率卻達到48.4%,所以投射姿勢真係唔係重點。


Ball目前黎講並唔係一位完美嘅球員,佢仲有好多地方可以改善,除左命中率就仲有失誤問題,不過佢確實好似佢阿爸LaVar Ball咁講,係一位可以令隊友變得更強嘅球員,佢嘅全能性亦都有目共睹,如果係接落黎嘅夏季聯賽能夠奪冠,咁樣Ball將更加令人期待,屆時相信一眾湖人球迷一定認定佢就係「天選之子」,係球隊未來再次奪冠嘅希望!

喺今年暑假,香港嘅體育盛事可謂一浪接一浪,其中就有英超亞洲盃、世界女排大獎賽、香港世界桌球大師賽2017等等。不過,如果講到世界性嘅盛事,近期就將會發生一場價值可能達到5億美元嘅賽事,講緊嘅就係拳擊界嘅「 ...
hobby
Mayweather vs McGregor「世紀之戰」價值將超越NFL超級盃!
20 Jul 2017
「籃球之神」Micheal Jordan可以話係NBA嘅歷史第一人,而如今佢雖然已經退役多年,但係影響力仍然驚人,其中佢嘅個人品牌Jordan更加係籃球鞋市場嘅一哥。而眼見中國市場巨大,所以Jordan亦喺多年前進入國內。不過, ...
hobby
【好睇過戲】喬丹體育控告Jordan品牌侵權!
20 Jul 2017