有睇開《蠟筆小新》嘅巴打應該都知道小新嘅老竇平時雖然好似冇L用咁，但事實上身懷「絕技」！每次面對敵人只要出動佢嘅臭腳、臭襪、臭鞋，都足以令敵人臭暈，陷入半死狀態，堪稱「最強生化武器（？）」！但一直以嚟，我哋都只可以從漫畫同動畫中猜測野原廣志對腳到底有幾臭，冇得實際挑戰自己嗅覺，而家日本SEGA Toys就決定畀機會大家，為鼻子帶來最大衝擊，特設「野原廣志臭襪」攤位，等大家聞下呢種「最強生化武器（？）」嘅威力！

東京玩具展SEGA Toys為咗宣傳新商品「ケツミントン（屁股網球）」，於是特登設置一個可以聞到廣志臭襪嘅的攤位，指呢對係玩完「屁股網球」之後嘅廣志臭襪，並用上化學香料去調配出廣志嘅臭襪味。咪以為呢對臭襪頂多只係酸酸醙醙咁，聽聞呢對襪嘅臭味係勁到會想叫廣志要去睇醫生！

為咗在場人士嘅鼻哥著想，臭襪側邊仲放咗消臭劑同咖啡豆，等大家聞完廣志對臭襪之後，可以盡快忘記嗰陣臭味！真係好想知道究竟嗰陣係誇張成點嘅氣味！