以名古屋為基地嘅日本中日新聞網（Chuichi Web）報道，豐田（Toyota）已落實喺2022年，於日本國內發售配備「全固體電池」嘅電動車。 

現時主流電動車所採用嘅鋰離子電池，殼體內藏可燃性嘅有機溶媒電解液，一旦過熱或滲漏好易發生火警。

全固體電池（All-solid-state battery）內藏無機固體電解質，現階段嘅研究品，儲電量係鋰離子電池嘅兩倍，以最新款嘅電動車續航力達400km計算，豐田日後嘅固體電池車至少可以連續行800km而唔使充電。而喺充電時間方面，正常速度充滿只喺1小時以內，「急叉」時間更加短。

Prius PHV使用嘅鋰離子電池

豐田研究全固體電池多年，去年宣布該公司研究開發部與東京工業大學教授菅野了次成功研製全固體電池。

另方面，豐田宣布喺2019年，為中國內地巿場推出以小型SUV C-HR底盤發展而成電動車，呢款車仍然配鋰離子電池，續航力當然冇全固體電池車咁長，但豐田大搞電動車，穩陣喎，唔怕跟。