Photos: N君

暑假到，唔少老豆級車迷都同仔女去日本玩，自己又可以乘機「充電」，睇吓展覽，買吓同車有關嘅精品或書籍。 

MenClub讀者N君係日本忠實車迷，佢今日去咗由日本MX-5車主會「マツダ･ロードスターのオーナーズクラブ，即RCOJ（Roadster Club of Japan）」，喺萬事得橫浜R & D中心舉行嘅Roadster（即MX-5）展。

呢個展覽展期包括7月15至17日、22至23日及29至30日，一共7日，全部都係周末周日，展覽時間由正午12時至下午5時。

去橫浜R & D中心好方便，喺上野、東京、有樂町、品川呢幾個香港人熟悉嘅JR站，乘坐JR京浜東北線，喺新子安駅落車，一出站就見到雞乸咁大個Mazda R & D logo，跟住指示行六、七分鐘就到。

今次展覽其中一個焦點，係萬事得展出一部由廠方復修嘅第一代，又稱NA的MX-5（下稱Roadster），呢部車今年已28歲，喺1989年製造，屬最前期嘅「五仔」，復修前累計行咗約17萬公里。

去年廠方宣布計劃，重新投產NA零件，其中一項就係同石橋（Bridgestone）合作，復刻那些年應用於NA嘅SF 325系列，呢款輪胎尺碼為185/60 14，胎紋同當年一模一樣，但輪胎配方同物料則以最新技術製造。換言之，既能重現當年嘅元祖操控風味，但抓著力同耐用性又大增。

多咀搭一句，玩「五仔」，梗係原裝胎specs最忠於原著啦。

NA係經典，呢個係不爭事實，但最新嘅ND，車架硬淨咗好多好多，但又夠輕，筆者更覺得佢幾有NB嘅操控味道，而且新車唔使煩整車，一買即玩。

另外，萬事得屬下嘅付屬部件製造公司Mazda Ace，喺會上展出1:12嘅最新Roadster Skyactiv底盤模型試作版本，咦！呢架我有啲feel喎。

仲有，點少得去年4月22日，車系累計生產嘅第100萬部，呢部ND喺日本同世界巡迴展覽，車身有約7000個簽名，唔知有冇香港fans名字。

N君話喺展覽認識到RCOJ會長，對方操流利英語，「五仔迷」聚首，話題梗係講唔完，會長話該會目前約有1000名會員。