{ SKIP }
文:MenClub John Chan  
POSTED ON 15 Jul 2017

Photos & Video: Heat Production

Special Thanks: Macao Yellow

有時喺FK2同FK8 Civic Type R嘅facbook post,見到相信係EK、EG以至EF年代嘅Civic fans,批評最新嘅高性能Civic「唔知做緊乜」「唔知想點」,例如「Civic點可以有Turbo㗎?」「Civic使乜300幾匹呀?」「FK8做乜咁似Impreza㗎?」

少部份嘅用字更相當激動,似乎愈講愈嬲。 

睇到呢類批評,不妨抱諒解態度;發出呢類批評嘅巴打,亦不妨想想,時代不斷變,有啲嘢,唔會因你肉緊或難過而停落嚟。

一句講晒:嬲就無謂,搵部啱自己心水玩嘅仲好啦,人生,有幾多個十年……



我唔係本田忠實fans,唔會因為見到EK9 Type R而異常激動,甚至眼泛淚光(見過真有其人。)

但我在中學年代已知道高性能Civic係好勁嘅,日本房車賽出光車花嘅EF/EG,仲有泰國車神拿泰華/拿達活(Nattavude Charoensukhawatana)駕駛嘅EG 1600 Group A賽車,喺澳門盃狂追2500c.c. BMW M3對手,呢啲威水史真係講足一世。




撇開相對容易負擔、「易上車」、「易養」呢啲優點,高性能EG、EK(例如SiR、Type R)咁得人歡心,令到部份fans痴迷十幾廿年,無視廿多年來汽車界嘅最新發展,好大程度同呢類車車身輕、坐椅離地距與視點極低、豐富路面感,以至本田極高水平嘅高轉型自然吸氣引擎有關。

呢啲優勢就好似靚胸、幼腰、萌樣、皮膚滑溜同聰明加體貼咁攞命,最攞膽係:你揸住呢類Honda,會驟然覺得自己「威猛咗好多」,部車就好似靚女不斷攬實你狂叫:「Um…你爆我Tec啦!快啲呀!我叫你爆我Tec呀!」

「得得得,爆完Tec一齊飲煉奶,okay?」

男人試過呢啲咁「Chur」嘅上品之後,我諗冇幾多過可以返到轉頭。



冷靜啲睇,其實好多車、好多引擎都可以畀到呢種令人異常亢奮嘅勾魂魅力,睇多啲、見多啲、揸多啲,自然會明白。 

片中我提出過設問:「點解有DC2 Type R唔揀,走去揀部EK9 Type R?」

呢類問題或多或少帶戇居成份,點解唔揀呢啲,而揀嗰啲?我鍾意呢款就呢款,使唔使入張form要你approval呀?

論引擎馬力與扭力,以至日用性,我毫無疑問揀DC2 Type R,畢竟B18C機器喺兼顧低扭方面做得較好。但我都係鍾意EK9 Type R多啲,佢有更強剛性嘅底盤同車身,揸一陣就feel到兩者嘅分別,即使每部EK9 Type R嘅狀態有別,但以近3年我揸過嘅4部嚟講(當中有兩部係小改),佢哋嘅車身中槽抗扭度都好好,喺啲落差大嘅彎位(例如荃錦公路最高位,林務站向石崗方向嘅頭幾個彎),好firm,原裝DC2 Type R真係畀唔到水平嘅感覺。



無論係EK9 Type R,抑或DC2 Type R,兩款車嘅引擎都係要經常催谷至高轉,揸VTEC自然吸氣引擎車嘅人預咗,亦樂此不疲。

我嘗試以唔係「本田粉」嘅心態去試呢副引擎,坦白講,從4500rpm至5500rpm呢段,我只係覺得佢算係幾爽,談唔上刺激,但喺5800rpm至8000rpm,以至紅區之前,佢真係好惡。我冇儀器,亦冇apps,更加冇著背心仔嘅大波俄妹model喺前座乘客位「盪吓盪吓」,去話你知有幾震撼,但實時感覺到嘅氣場係:「呢件著白色衫嘅思域仔幾揪得。」





你同我都係得「15分」,無謂嘢嘢搏到盡,但喺啲一、二波,又或啱啱三波嘅彎路快揸,EK9 Type R好輕鬆駕馭到,喺佢身上唔多存在所謂「大馬力前驅車嘅缺點(以20年前標準)」,你想捽佢,令佢更快咩,佢能耐同實時表現都應付得到,而且仲好似想大你:「老細,夠唔夠膽再快啲?」

嗰一期嘅高性能Civic,就係有呢種撩你鬥惡嘅霸氣。







循例要講講低扭,真係比B18C再差少少,有時處於三波龜速蠕動,想稍作加速,不得不拖落二波。

我明白,B16B始終係偏向高轉動力發放,預咗頭段表現要有犧牲。拍攝前我有數小時喺新界試車,有一半時間係刻意慢速行車,諗唔到呢款引擎原來幾慳油,只要你唔爆Tec,油針唔會大幅度滑落。

有謂「家家有本難唸的經」,我唔知你銀行戶口係唔係億億聲大把錢,但以一部高轉表現好吸引嘅1.6公升車仔嚟講,EK9 Type R確實易養。頂佢,呢部車個冷氣仲鬼死咁凍,拎嚟做「腳」都得喎……





一擔沙糖一擔dee,如果你係十零廿歲仔,老媽子或老豆畀嚿錢你買部車玩吓,小弟真係唔會建議你買EK9 Type R,先唔講閣下駕駛技術去到邊個境界,我只擔心你心智未夠成熟駕馭呢部車,亦好肯定你未有時間重溫20年來涉及EK9 Type R嘅嚴重交通意外報道。

買部唔大power嘅紮實歐洲車操好手車先,okay?

三字尾、四字頭嗰批巴打,你哋做咗人老豆㗎,啲仔女仲未大晒,要等Daddy養,買到企理嘅Type R,間中爽兩腳,見好就要收喇,唔好再諗咩「一百八十」,本田元祖Civic Type R,就係要靠你呢班大哥「保育」。

祝出入平安。



Honda Civic Type R (EK9)規格

車型:三門四座

體積:(長)4180mm x (闊 )1695mm x (高)1360mm

軸距:2620mm

引擎:B16B型,1595c.c. 直列4汽缸DOHC 16活瓣,前置引擎

口徑 x 衝程:81.0mm x 77.4mm

壓縮比:10.8:1

馬力:185匹/8200rpm

扭力:16.3kgm/7500rpm

波箱:5前速手動,前輪驅動

1波:3.230

2波:2.105

3波:1.458

4波:1.107

5波:0.848

最終傳動比:4.400

懸掛:(前)雙搖臂;(後)雙搖臂

制動:(前)透氣碟;(後 )實心碟

車重:1050kg

油缸容積:45公升

輪胎:195/55 R15(前、後)


呢部620係咪大家見過最靚嘅改裝車?大概都唔會係。但今時今日仲有位年青人會同爸爸一齊落手落腳改裝一部車,呢份父子情就實屬難得。
auto
父子的浪漫 沖繩改裝Pick Up Truck
19 Nov 2017
Tesla在昨晚活動中公布了他們第一部電動貨車:Semi,以及第二代Roadster,你沒看錯,的確是第二代Roadster。
auto
Tesla連環出擊:1.9秒Roadster•5秒Semi
17 Nov 2017